កូរ៉េខាងជើង បាញ់មីស៊ីលប្លោងមួយគ្រាប់ឆ្លងកាត់ទឹកដីរបស់ ជប៉ុន នាំឱ្យក្រុមមន្ត្រីប្រទេសនេះចេញបញ្ជាឱ្យឈ្លៀសប្រជាជនទៅរកទីសុវត្ថិភាព។
«កូរ៉េខាងជើង បានបាញ់មីស៊ីល។ សូមភៀសខ្លួនទៅរកសំណង់រឹងមាំ ឬបន្ទប់ក្រោមដី» រដ្ឋាភិបាលជប៉ុន បានព្រមានដូច្នេះ នៅក្នុងប្រកាសមួយដែលចេញកាលពីវេលាម៉ោង ៧ និង ២៩ នាទីព្រឹកនេះ (ម៉ោង ៥ និង ២៩ នាទី នៅ កម្ពុជា)។ ទូរទស្សន៍ជាតិជប៉ុន NHK បានបន្ថែមថា ការព្រមាននេះត្រូវបានអនុវត្តនៅក្នុងខេត្តចំនួន ២ គឺ Hokkaido និង Aomori។
ការិយាល័យនាយករដ្ឋមន្ត្រីជប៉ុន ក្រោយមកក៏បានប្រកាសថា «វត្ថុមួយដែលសង្ស័យថា ជាមីស៊ីលប្លោងរបស់ កូរ៉េខាងជើង បានហោះកាត់ពីលើដែនដី» ខណៈដែលប៉ូលិសជប៉ុន និយាយថា មីស៊ីលបានធ្លាក់ចុះសមុទ្រ និងបានព្រមានមិនឱ្យចូលទៅក្បែរបំណែករបស់វត្ថុនោះ។
នាយករដ្ឋមន្ត្រីជប៉ុន Fumio Kishida បានថ្កោលទោសទង្វើរបស់ កូរ៉េខាងជើង។ នេះគឺជាលើកដំបូងហើយដែល ទីក្រុងព្យុងយ៉ាង បាញ់ប្លោងមីស៊ីលឆ្លងកាត់ ប្រទេសជប៉ុន ក្នុងរង្វង់ ៥ ឆ្នាំកន្លង និងជាលើកទី ៧ ដែលមីស៊ីលរបស់ កូរ៉េខាងជើង ហោះរំលងទឹកដីរបស់ ជប៉ុន រាប់ចាប់ពីឆ្នាំ ១៩៩៨។
កូរ៉េខាងជើង បានសាកល្បងមីស៊ីល ៥ លើករួចមកហើយ នៅក្នុងរង្វង់ ១០ ថ្ងៃចុងក្រោយនេះ ក្នុងគ្រាដែល សហរដ្ឋអាម៉េរិក ជប៉ុន និង កូរ៉េខាងត្បូង កាលពីចុងសប្ដាហ៍កន្លង បានធ្វើសមយុទ្ធយោធារួមគ្នា។ ទង្វើរបស់ ទីក្រុងព្យុងយ៉ាង ធ្វើឱ្យបណ្ដារដ្ឋាភិបាលក្នុងតំបន់ រួមនឹង ទីក្រុងវ៉ាស៊ីងតោន និងក្រុមអ្នកតាមដានស្ថានការណ៍ ព្រួយបារម្ភថា កូរ៉េខាងជើង កំពុងតែបង្កើតឈ្នាន់សម្រាប់ការធ្វើតេស្តអាវុធនុយក្លេអែរ។
កូរ៉េខាងជើង បានសាកល្បងអាវុធនុយក្លេអែរចំនួន ៦ លើកមកហើយ ចាប់តាំងពីឆ្នាំ ២០០៦ ក្នុងនោះ ការធ្វើតេស្តលើកចុងក្រោយត្រូវបានធ្វើឡើងកាលពីខែកញ្ញា ២០១៧៕
