វេជ្ជ​បណ្ឌិត​នៅ​អេស្ប៉ាញ ត្រូវ​បង្ខំ​ចិត្ត​ជ្រើស​រើស​ “​អ្នក​ជំងឺ​ណាគួរ​​ស្លាប់​ និង​អ្នក​ជំងឺ​ណា​គួរ​រស់​”

វេជ្ជ​បណ្ឌិត​អេស្ប៉ាញ ត្រូវ​បង្ខំ​ចិត្ត​ជ្រើស​រើស​

នៅ​ក្នុង​បន្ទប់​សង្គ្រោះបន្ទាន់​នៃ​មន្ទីរ​ពេទ្យ​នៅ​ទីក្រុង Madrid វេជ្ជ​បណ្ឌិត​ Bernabeu បាន​ចុះ​ហត្ថលេខា​លើ​លិខិត​​បញ្ជាក់​មរណ​ភាព​ជូន​លោក​តា​ម្នាក់ ហើយ​បាន​ងាក​ទៅ​ជួយ​សង្គ្រោះ​អ្នក​ជំងឺ​ម្នាក់​ផ្សេង​ទៀត​ដែល​កំពុង​ដង្ហក់​ ដោយ​ទុក​ឱ្យ​លោក​តា​ម្នាក់​នោះ​​បាត់​បង់ជីវិត​ ដោយ​គ្មាន​ការ​ជួយ​សង្គ្រោះ​។

“​នៅក្នុង​ស្ថាន​ភាព​ផ្សេង​ លោក​តា​នោះ​នឹង​មាន​ឱកាស​ទទួល​បាន​ការ​ជួយ​សង្គ្រោះ​ជីវិត​។ ក៏ប៉ុន្តែ នៅ​ទី​នេះ​មាន​មនុស្ស​ច្រើន​ហួស​ពេក​ ហើយ​អ្នក​ទាំង​អស់​សុទ្ធ​តែ​កំពុង​ដង្ហក់​​រក​ខ្យល់​ដូច​ៗ​គ្នា​” វេជ្ជ​បណ្ឌិត​ Daniel Bernabeu ធ្វើ​ការ​នៅ​ឯ​មន្ទីរពេទ្យ​ La Paz (ដែល​ជា​មន្ទីរពេទ្យ​ធំ​ជាង​គេ​មួយ​នៅ​ក្នុង​រាជធានី​ Madrid របស់​ប្រទេស​អេស្ប៉ាញ) បាន​ថ្លែង​ដូច្នេះ​កាល​ពី​ម្សិល​មិញ​។

វេជ្ជ​បណ្ឌិត​ Bernabeu បាន​ឱ្យ​ដឹង​ថា បន្ទប់​ពិសេស​ទាំង​អស់​នៅ​ក្នុង​មន្ទីរពេទ្យ​នេះ​សុទ្ធ​តែ​ចង្អៀត​ណែន ហើយ​ក្រុម​គ្រូពេទ្យ​ត្រូវ​បាន​ស្នើ​ឱ្យ​ផ្ដល់​អាទិភាព​ក្នុង​ការ​ព្យាបាល​អ្នកជំងឺ​ដែល​មាន​វ័យ​ក្មេង​ ព្រោះ​ថា អ្នក​ជំងឺ​ចាស់​ៗដែល​បាន​ឆ្លង​វីរុស​COVID-19 សុទ្ធ​តែ​មាន​ឱកាស​ជា​សះ​ស្បើយ​តិច​តួច​បំផុត។ អ្នកជំងឺ​ជា​ច្រើន​បាន​ដាច់​ខ្យល់​ស្លាប់​ខណៈ​កំពុងស្ថិត​នៅ​ក្នុង​បន្ទប់​​រង់ចាំ​ មុន​ពេលត្រូវ​បាន​ជួយ​សង្គ្រោះ ព្រោះ​ថា ទាំង​មន្ទីរពេទ្យ ទាំង​បុគ្គលិក​ពេទ្យ​ សុទ្ធ​តែ​ត្រូវ​ធ្វើ​ការ​លើស​ចំណុះដូចគ្នា​។

នៅ​ឯមន្ទីរពេទ្យ​ La Paz ដែល​មាន​អគារ​ធំៗ​ចំនួន​17​អគារ​ ក្នុង​បន្ទប់សង្គ្រោះ​បន្ទាន់​កាល​ពី​ថ្ងៃទី​24​មីនា មាន​ពេល​ខ្លះ​ត្រូវ​ទទួល​អ្នក​ជំងឺ​រហូត​ដល់​240​នាក់​ ដែល​កំពុង​រង់​ចាំ​ចូល​សម្រាក​ព្យាបាល​។ ក្រុម​គ្រូពេទ្យ​នៅ​ជួរ​មុខ មិន​មាន​ឈុត​ការ​ពារ​ការ​ឆ្លង​មេរោគ​គ្រប់​គ្រាន់​នោះ​ទេ ដោយ​ពួកគេ​ខ្លះ​ពាក់​តែ​អាវ​ធំ​ពី​ក្រៅ​ និង​ពាក់​ម៉ាស់​តែ​ប៉ុណ្ណោះ។ ក្រុម​គ្រូពេទ្យ​ទាំង​នេះ​ត្រូវ​បាន​ស្នើ​ឱ្យ​នៅ​ឆ្ងាយ​ពី​អ្ន​កជំងឺ​ប្រវែង​1ម៉ែត្រ ប៉ុន្តែ​ប្រការ​នេះ​គឺ​មិន​អាច​ទៅ​រួច​នោះ​ទេ​។ នេះ​ក៏ជា​កត្តា​ដែល​នាំ​ឱ្យ​​បុគ្គលិក​សុខាភិបាល​ប្រមាណជា​4,000​នាក់(ស្មើ​នឹង​12% នៃ​អ្នក​ជំងឺ​សរុប) ​របស់​អេស្ប៉ាញ បាន​ឆ្លង​វីរុសCOVID-19​។

ប្រទេស​អេស្ប៉ាញ បច្ចុប្បន្ន មាន​អ្នក​ជំងឺ​កូរ៉ូណា​ COVID-19 ជិត​58,000​នាក់​ ក្នុង​នោះ​មាន​4,365​នាក់​បាន​បាត់​បង់ជីវិត​ ពោល​គឺ​ខ្ពស់​ជាង​ប្រទេស​ចិន និង​ទាប​ជាង​​​ប្រទេស​អ៊ីតាលី​​មួយតែ​​ប៉ុណ្ណោះ។

គួរ​រំឭក​ថា កាល​ពី​ថ្ងៃទី​8មីនា នាយក​រដ្ឋមន្ត្រី​អេស្ប៉ាញ លោក Sanchez​ បាន​លើក​ទឹក​ចិត្ត​ឱ្យ​ពលរដ្ឋ​អេស្ប៉ាញ​ចូល​រួម​ក្នុង​ព្រឹត្ត​ការណ៍​ដ៏​ធំមួយ​ដើម្បី​អបអរ​ថ្ងៃ​សិទ្ធិ​នារី​អន្តរ​ជាតិ​ ដោយ​មិន​អើពើ​ចំពោះ​​បម្រាម​គោចរ​នៅ​ភាគ​ខាង​ជើង​ប្រទេស​នេះ​។

ព្រឹត្តិការ​ខាង​លើ​នោះ មាន​មនុស្សប្រមាណជា​120,000​នាក់​បាន​ចូល​រួម ក្នុង​នោះ​មាន​រដ្ឋមន្ត្រី​ជា​ច្រើន​រូប រួម​នឹង​លោក​ Sanchez និង​លោក​ស្រី Begona Gomez​ ផងដែរ​។ រាជ​រដ្ឋាភិបាល​អេស្ប៉ាញ​ពេល​នោះ​គិត​ថា ស្ថាន​ភាព​អាសន្ន​រោគ​នៅ​ពេល​នោះ​អាច​គ្រប់​គ្រង​បាន​នៅឡើយ​។ ប៉ុន្តែ Begona Gomez ដែល​ជា​ភរិយា​របស់​នាយក​រដ្ឋមន្ត្រី​អេស្ប៉ាញ ជាមួយ​នឹង​រដ្ឋមន្ត្រី​ក្រសួង​សមធម៌ Irene Montero និង​ឧបនាយក​រដ្ឋមន្ត្រី Carmen Calvo ក៏បាន​ឆ្លង​វីរុស​COVID-19.

លោក​នាយក​រដ្ឋមន្ត្រី​ Sanchez កាល​ពី​ថ្ងៃទី​15​មីនា បាន​ចេញ​បញ្ជា​ឱ្យ​បិទ​ប្រទេស​ទាំង​ស្រុង​ និង​ចាប់​ផ្ដើម​ចាត់វិធាន​ការ​ថ្មី​ៗ និង​ខ្លាំង​ក្លា​ជា​បន្ត​បន្ទាប់​។ ក៏ប៉ុន្តែ វា​ហាក់ដូច​ជា​យឺត​ពេលបន្តិច​​ទៅហើយ​ ខណៈ​ដែល​ប្រទេស​នេះ​កំពុង​ខ្វះ​ខាត់ស្ទើរ​គ្រប់​យ៉ាង​ក្នុង​វិស័យ​សុខាភិបាល​៕

ប្រភព៖ សារ​ព័ត៌មានបរទេស