វៀតណាមដណ្ដើមបានតំណែងជើងឯក និងទទួលបានមេដាយមាសនៅក្នុងហ្គេមសង្គ្រាម Tank Biathlon 2020 នៃក្រុមទីពីរ ក្រោយពីបានផ្ដួលគូប្រកួតខ្លាំងៗនៅក្នុងការប្រកួតផ្ដាច់ព្រ័ត្រ។
ចូលដល់វគ្គជម្រុះ ក្រុមរថក្រោះរបស់វៀតណាម បានបង្ហាញអំពីសមត្ថភាពល្អគួរសម និងបានឡើងដល់វគ្គពាក់់កណ្ដាលផ្ដាច់ព្រ័ត្រក្នុងលទ្ធផលដែលអាចទទួលយកបាន។
នៅក្នុងការប្រកួតវគ្គពាក់កណ្ដាលផ្ដាច់ព្រ័ត្រ ក្រុមរថក្រោះវៀតណាមបានទទួលបរាជ័យនៅចំពោះមុខក្រុមរបស់មីយ៉ានម៉ា ប៉ុន្តែ ក្រុមមីយ៉ានម៉ាក៏យកឈ្នះក្នុងលទ្ធផលប្រកៀកប្រកិតគ្នា ពោលគឺទៅដល់គោលដៅមុនក្រុមវៀតណាមតែប៉ុន្មាននាទីប៉ុណ្ណោះ។
ក្រុមរថក្រោះដទៃដែលបានប្រកួតក្នុងវគ្គពាក់កណ្ដាលផ្ដាច់ព្រ័ត្រ សុទ្ធតែទទួលបានពិន្ទុទាបជាងក្រុមវៀតណាម ដូច្នេះក្រុមវៀតណាមក៏បានឡើងដល់វគ្គផ្ដាច់ព្រ័ត្រក្នុងចំណាត់ថ្នាក់លេខ2។
ឈានចូលដល់វគ្គផ្ដាច់ព្រ័ត្រនៅក្នុងក្រុមទីពីរនៃការប្រកួតរថក្រោះ Tank Biathlon 2020 ក្រុមវៀតណាមបានបង្ហាញអំពីសមត្ថភាពដ៏ខ្លាំងក្លា និងលេចធ្លោជាងគេ បើទោះពេលខ្លះ ក្រុមដទៃធ្វើបានល្អជាងក៏ដោយ។
សារព័ត៌មានវៀតណាមបានចេញផ្សាយថា នៅពេលដែលរថក្រោះ T-72B3 ពណ៌លឿងរបស់វៀតណាមបានទៅដល់គោលដៅមុនគេ ក្រុមអ្នកគាំទ្របានយំដោយការសប្បាយចិត្ត ខណៈប្រជាជនជាច្រើននៅទូទាំងប្រទេសវៀតណាម នាំគ្នាអបអរជ័យជំនះនេះ។
ក្រុមរថក្រោះវៀតណាមដណ្ដើមបានតំណែងជើងឯក គឺដោយសារក្រុមនេះទៅដល់គោលដៅបានលឿនជាងគេ និងកម្ទេចផ្ទាំងស៊ីបបានច្រើនជាងគេបង្អស់ផងដែរ។
ដូច្នេះ ជាមួយនឹងតំណែងជើងឯក និងមេដាយមាសដែលទើបទទួលបាន ឆ្នាំក្រោយ (2021) នៅក្នុងការប្រកួត Tank Biathlon 2021 ក្រុមរថក្រោះវៀតណាមនឹងបានឡើងទៅប្រកួតនៅក្នុងក្រុមទីមួយ ដែលនៅទីនោះនឹងមានគូប្រជែងខ្លាំងៗបំផុត ដូចជា រុស្ស៊ី (ម្ចាស់ផ្ទះ) ចិន និងបេឡារុសជាដើម។ល។
ប្រភព៖ vietnamnews
