ដោយសារព្រំដែនត្រូវបិទព្រោះតែ Covid-19 ធ្វើឱ្យក្រុមអ្នកការទូតរុស្ស៊ីប្រចាំនៅរដ្ឋធានីព្យុងយ៉ាងនៃប្រទេសកូរ៉េខាងជើង ត្រូវបង្ខំចិត្តផ្ទុកអីវ៉ាន់លើរទេះឡូរីគ្មានម៉ាស៊ីន ហើយរុញ និងអូសតាមផ្លូវដែកត្រលប់ទៅប្រទេសវិញយ៉ាងកម្សត់ មិនគួរឱ្យជឿ។
មន្ត្រីការទូត រួមនឹងគ្រួសាររបស់ពួកគេ សរុប 8 នាក់ ដែលបានត្រលប់ទៅរុស្ស៊ីវិញកាលពីថ្ងៃទី 25 កុម្ភៈ ត្រូវប្ដូរមធ្យោបាយធ្វើដំណើរជាច្រើនកន្លែងក្នុងអំឡុងដំណើរត្រលប់ទៅប្រទេសរបស់ខ្លួន ដោយសារតែទីក្រុងព្យុងយ៉ាងបានដាក់វិធានការទប់ស្កាត់ Covid-19 យ៉ាងតឹងរ៉ឹងជាទីបំផុត ក្នុងនោះក៏មានការហាមរាល់មធ្យោបាយដឹកជញ្ជូនអ្នកដំណើរឆ្លងកាត់ព្រំដែនផងដែរ។
«ព្រោះតែព្រំដែនត្រូវបានបិទជាងមួយឆ្នាំ ហើយយានយន្តដឹកអ្នកដំណើរក៏ត្រូវបានផ្អាក ទើបក្រុមបុគ្គលិកការទូតរុស្ស៊ី ត្រូវឆ្លងកាត់ការធ្វើដំណើរប្រកបដោយការលំបាកដើម្បីត្រលប់ទៅផ្ទះ» នេះបើតាមក្រសួងការបរទេសរុស្ស៊ី ប្រកាសកាលពីថ្ងៃទី 25 កុម្ភៈ។
ក្រុមអ្នកការទូតដែលមានគ្នា 8 នាក់នេះ ក៏មានកុមារអាយុ 3 ឆ្នាំម្នាក់ផងដែរ បានជិះរថភ្លើង 32 ម៉ោង និងជិះរថយន្តក្រុង 2 ម៉ោង ពីទីក្រុងព្យុងយ៉ាងទៅកាន់ព្រំដែនជាប់ជាមួយរុស្ស៊ី។ ទៅដល់កំណាត់ផ្លូវមានស្ពានឆ្លងកាត់ផ្លូវដែកដែលឆ្លងកាត់ទន្លេ Tumen នៅក្បែរព្រំដែនកូរ៉េខាងជើង និងរុស្ស៊ី ពួកគេក៏ត្រូវធ្វើដំណើរដោយថ្មើរជើង។
«ពួកគេលើកដាក់អីវ៉ាន់ពេញរទេះ ហើយអូសតាមបណ្ដោយផ្លូវដែកដើម្បីឆ្លងទៅខាងនាយ» ក្រសួងការបរទេសរុស្ស៊ីបកស្រាយនៅពេលប្រកាសបង្ហាញរូបថត និងវីដេអូដែលបង្ហាញអំពីរទេះឡូរីដែលផ្ទុកពេញដោយអីវ៉ាន់ ត្រូវអូសឆ្លងកាត់ស្ពានផ្លូវដែកក្បែរព្រំដែន។
Vladislav Sorokin ដែលជាលេខាធិការទីបីរបស់ស្ថានទូតរុស្ស៊ីប្រចាំទីក្រុងព្យុងយ៉ាង គឺជា «ម៉ាស៊ីន» របស់រទេះឡូរីនេះ។ គាត់គឺជាបុរសពេញកម្លាំងតែម្នាក់គាត់នៅក្នុងក្រុម ទទួលបន្ទុករុញរទេះឡូរីក្នុងរយៈចម្ងាយជាងមួយគីឡូម៉ែត្រ ឆ្លងកាត់ព្រំដែនកូរ៉េខាងជើង ដើម្បីចូលទឹកដីរុស្ស៊ី។
ក្រុមមន្ត្រីរួមការងារនៅក្នុងក្រសួងការបរទេសរុស្ស៊ី នាំគ្នាមករង់ចាំទទួលនៅឯម្ខាងព្រំដែន រួចនាំពួកគេឡើងរថយន្តក្រុង ធ្វើដំណើរទៅកាន់ព្រលានយន្តហោះរបស់ទីក្រុង Vladivostok ក្នុងតំបន់ចុងបូព៌ាដែលស្ថិតក្នុងប្រទេសរុស្ស៊ី៕
ប្រភព៖ Reuters, BBC
ប្រែសម្រួល៖ បុត្រា
