រដូវរស្សាអាកាសធាតុក៏មិនក្តៅហែងដូចមុនដែរ ដ្បិតថាវាមានភ្លៀងធ្លាក់ជាបន្តបន្ទាប់ដែលអាចធ្វើឱ្យអ្នកមានការពិបាកក្នុងការធ្វើដំណើរទៅណាមកណាបន្តិចក្តី ប៉ុន្តែគ្រាន់តែនឹកគិតដល់ការជួបជុំដែលនឹងមកដល់នៅក្នុងឱកាសបុណ្យភ្ជុំបិណ្ឌខាងមុខនេះភ្លាម ភាពធុញថប់ដែលបណ្តាលមកដំណក់ទឹកភ្លៀងក៏នឹងរសាយចេញពីក្នុងចិត្តភ្លាមដែរ ព្រោះថាការជួបជុំគ្នានេះហើយជាប្រភពនៃភាពសប្បាយរីករាយ សេចក្តីសុខ សុភមង្គល និងជាចំណងដែលចាំជួយចងរឹតបន្តឹងទំនាក់ទំនងក្នុងគ្រួសារ សាច់ញាតិឱ្យកាន់តែមានភាពរឹង
មាំ។ កុំបារម្ភ! បើទោះជាឱកាសនៃការបង្ហាញសម្រស់នេះស្ថិតនៅក្នុងអំឡុងពេលភ្លៀងធ្លាក់ក្តី ក៏ភាពស្អាតរបស់អ្នកមិនបាត់បង់ទៅណាដែរ ប្រសិនបើអ្នកអនុវត្តតាមវិធីងាយៗខាងក្រោមនេះ៖
មើលថែស្បែក
រដូវភ្លៀងគឺជាពេលវេលាដែលស្បែកងាយនឹងមានសភាពរម៉ាស់ ក្រហម ឡើងកន្ទួល ឬរោល ព្រោះតែជាតិសំណើមនៃទឹកភ្លៀងដែលជាប់នៅលើស្បែក។ ដូច្នេះដើម្បីការពារស្បែកកុំឱ្យកើតមានបញ្ហាទាំងនេះអ្នកគួរតែការពារវាកុំឱ្យទទឹក ឬត្រូវប្រញាប់ងូតទឹកសម្អាតខ្លួនចេញឱ្យស្អាត។ ក្រែមថែរក្សាស្បែក គឺនៅតែត្រូវប្រើជាចាំបាច់ ដើម្បីថែរក្សាស្បែកពីភាពស្ងួតគ្រើម បើទោះជារដូវនេះជារដូវភ្លៀងក្តី តែក៏មិនមែនមានន័យថា ស្បែកមិនត្រូវការសំណើមនោះដែរប៉ុន្តែសូមចៀសវាងការប្រើក្រែមផ្តល់សំណើមដែលមានកម្រិតខ្លាំង ឬមានជាតិខ្លាញ់ខ្លាំងពេកនិងត្រូវខាត់សម្អាត កម្ចាត់ស្បែកចាស់ៗចោលម្តង ឬពីរដងក្នុងមួយសប្តាហ៍។
មុខ
សម្រាប់រដូវកាលនេះអ្នកគួរតែផាត់មុខបែបស្រាល ព្រោះប្រសិនបើអ្នកផាត់មុខខ្លាំង ហើយត្រូវទឹកវិញនោះ ម្សៅនឹងឡើងប្រតាក អាក្រក់មើលខ្លាំងណាស់។ ម្យ៉ាងវិញទៀតអ្នកក៏មិនគួរប្រើម៉ាស្ការ៉ានោះដែរ ប៉ុន្តែអ្នកអាចប្រើ Eyeliner ជំនួសក៏បាន។
សក់
រដូវកាលនេះអ្នកគួរសម្អាតសក់ឱ្យបានញឹក-ញាប់បន្តិច ហើយក៏ត្រូវចៀសវាងការប្រើប្រាស់ផលិតផលសម្រាប់សក់ច្រើនជ្រុលផងដែរ ហើយគួរប្រើតែសាប៊ូណាដែលមានកម្រិតស្រាល និងប្រើក្រែមបន្ទន់សក់រួមជាមួយផង។ ក្រៅពីថែ-រក្សាហើយនោះ ការធ្វើម៉ូដសក់ក៏សំខាន់ណាស់ដែរ។ ក្នុងរដូវកាលភ្លៀងធ្លាក់បែបនេះអ្នកមិនគួរទម្លាក់សក់នោះទេ យកល្អគួរតែចងលើកវាឱ្យខ្ពស់ៗទៅ ទើបវាមិនធ្វើឱ្យមានអារម្មណ៍ថារញ៉េ-រញ៉ៃ និងមានភាពសើមជាប់ស្បែកប្រសិនបើវាទទឹក។
ជើង
ពេលមានភ្លៀងកន្លែងខ្លះប្រាកដជាមានទឹកដក់ ដូច្នេះបើអាចចៀសបានអ្នកគួរតែចៀស ប៉ុន្តែបើចៀសមិនបានទេនោះ អ្នកគួរតែប្រញាប់ប្រ-ញាល់ក្នុងការលាងសម្អាតជើង និងក្រចកជើងរបស់អ្នកឱ្យបានស្អាត និងជូតវាឱ្យស្ងួត ព្រោះថាបើបណ្តោយឱ្យទឹកកខ្វក់ទាំងនោះនៅជាប់ជើងរបស់អ្នកយូរពេក វាអាចនឹងបង្កឱ្យឆ្លងមេរោគផ្សិតជាដើម។
រដូវភ្លៀង ភ្លៀងនឹងធ្លាក់ពេលណាក៏មិនដឹង ដូច្នេះសូមអ្នកកុំខ្ចិលក្នុងការនាំយកនូវអាវភ្លៀងឬឆ័ត្រទៅតាមខ្លួនផង ដើម្បីសុវត្ថិភាពទាំងចំ-ពោះសម្រស់ និងសុខភាពរបស់អ្នក៕
