ស្វែងរក​ទីតាំង​ល្អ​បំផុត​សម្រាប់​រាត្រី​ទឹកឃ្មុំ​របស់​អ្នក

បន្ទាប់ពី​ភាព​ហត់នឿយ និង​មមាញឹក​យ៉ាង​វីវក់​នៅក្នុង​ពិធី​រៀប​អាពាហ៍ពិពាហ៍​ត្រូវបាន​បញ្ចប់​ជា​ស្ថាពរ ពេលវេលា​ដែល​អ្នក​ត្រូវ​គិតដល់​សេចក្តីសុខ​នៃ​ការបង្កើត​អនុស្សាវរីយ៍​ដ៏​ផ្អែមល្ហែមក៏​ឈានចូល​មកដល់។ ព្រោះ​វា​ជា​ពេលវេលា​នៃ​ការចងចាំ​ដ៏​ល្អ​បំផុត​សម្រាប់​ជីវិត​គូរ​បស់​អ្នក ហេតុដូច្នេះ​អ្នក​គួរតែ​ស្វែងរក​ទីតាំងដែល​ល្អបំផុតសម្រាប់ដំណើរកម្សាន្ត​ក្រេប​ចន្ធ​ទឹកឃ្មុំ​របស់​អ្នក។ វា​ជាការ​ប្រសើរ​ណាស់​បើ​អ្នក​បានរៀបចំ ឬ​បានដាក់​គម្រោង​រួចជាស្រេច​ហើយ​ថា​នឹងត្រូវ​ធ្វើដំណើរ​ទៅកាន់​កន្លែង​ណាមួយ​នោះ ប៉ុន្តែ​បើ​អ្នក​នៅ​មិនទាន់​សម្រេចចិត្ត​នៅឡើយ​ទេនោះ ឡា​រ៉ែ​ន សូមណែនាំទីតាំងល្បីៗលំដាប់ថ្នាក់​ពិភពលោកមួយចំនួនមក​ជម្រាបជូន​លោកអ្នក​ដូចតទៅ៖

Hawaii
ស្ថិតនៅលើ​ទឹកដី​នៃ​ប្រទេស​ដ៏​សម្បូរបែប​ស្ទើរ​គ្រប់យ៉ាង ដែល​ត្រូវបាន​ចាត់ទុកថា​ជាទី​តាំង​ដ៏​វិសេសវិសាល​បំផុត​សម្រាប់​ពេលវេលា​ក្រេបទឹក​ឃ្មុំ​ដ៏​ផ្អែមល្ហែម​របស់​គូស្នេហ៍​ថ្មោងថ្មី។ ជាមួយនឹង​ទេសភាព​ដ៏​ស្រស់បំព្រង រួម​ជាមួយនឹង​បរិយាកាសផ្សេងៗគ្នា​ដូចជា ទស្សនា​ភ្នំភ្លើង ទស្សនា​តំបន់​ដាច់ស្រយាល ការកម្សាន្ត​លើ​កោះ និង​តំបន់ឆ្នេរ​ជាដើម អ្នក​ពិតជា​មិនអាច​បដិសេធ​បានឡើយ​ទៅនឹង​ពាក្យ​ដែល​គេ​បាន​ល្បី​ថា Hawaii គឺជា​ទីតាំង​ល្បីល្បាញ​បំផុត​ជាប់​ចំណាត់ថ្នាក់​លេខ1ក្នុងនាម​ជា​កន្លែង​ល្អ​បំផុត​ក្នុងការ​ធ្វើដំណើរ​ទៅ​ក្រេបទឹក​ឃ្មុំ។

Tahiti
កោះ​ដ៏​ធំជាងគេ​នៅក្នុង​ប្រទេស​បារាំង ហើយក៏​ជា​កោះ​ដ៏​ល្បីល្បាញ​ជាប់​ចំណាត់ថ្នាក់​លេខ2ក្នុង​ពិភពលោក​ផងដែរ។ ទីកន្លែង​មួយ​ដែលត្រូវបាន​រចនា​ឡើង​សម្រាប់ការ​មក​កម្សាន្ត​ជា​គូនិង​សម្រាប់​ការ​ក្រេប​ទឹកឃ្មុំ​នៃ​គូ​ស្វាមីភរិយា​ដែល​ទើបតែ​រៀបការ​រួច។ Tahiti គឺជា​ចម្លើយ​សម្រាប់​អ្នក​ដែល​កំពុង​ស្វែងរក​ទីតាំង​សម្រាប់​បង្កើត​អនុស្សាវរីយ៍​ដែល​មិនអាច​បំភ្លេចបាន​ក្នុង​ជីវិត។ ទីនោះ​មាន​កោះ​ច្រើនជាង118កន្លែងតំបន់​ភ្នំភ្លើង​មួយកន្លែង និង​កន្លែងល្បីៗជាច្រើន​ទៀត ដូចជា ការ​ងូតទឹក​លេង និង​ការដើរ​ទស្សនា​ព្រៃព្រឹក្សា និង​ឆ្នេរ​ខ្សាច់​ពណ៌​ខ្មៅ​ដែលជា​ចំណុច​ទាក់ទាញ​បំផុត​ផងដែរ។ Moorea និង Bora Bora គឺជា​ទីកន្លែង​ដ៏​ស័ក្តិសម​បំផុត​សម្រាប់​ដំណើរ​កម្សាន្ត​ក្រេប​ចន្ទ​ទឹកឃ្មុំ​របស់​អ្នក។

Anguilla
ចាប់តាំងពី​កោះ​មួយ​នេះ​ត្រូវបាន​គេ​រកឃើញ​នៅក្នុង​ឈូង​សមុទ្រ Caribbean អ្នក​ពិតជា​អាច​រំពឹងទុក​ថា​នឹង​បានឃើញ​ឆ្នេរ​ខ្សាច់​សក្បុស រួម​ជាមួយនឹង​ទឹកសមុទ្រ​ថ្លា​ខៀវស្រងាត់ ព្រមទាំង​អាកាសធាតុ​ដ៏​ល្អ​បំផុត។ បើ​រៀបរាប់​អំពី​ភាពស្រស់ស្អាត​វា​អាច​នឹងមាន​ភាព​ប្រហាក់ប្រហែលគ្នា​ទៅនឹង​ទីកន្លែងល្បីៗជាច្រើន​ទៀត ប៉ុន្តែ​អ្វីដែល​ធ្វើឱ្យ​កោះ​មួយ​នេះ​ទទួលបាន​កេរ្តិ៍ឈ្មោះ​ល្បី​រន្ទឺ​នោះ​គឺ​សម្រស់និង​ភាព​ទាក់ទាញ​នៃ​វត្តមាន​របស់​សណ្ឋាគារ​លំដាប់​ពិភពលោក​របស់ខ្លួន​តែម្តង៕

Advertisement