ក្នុងរដូវភ្លៀង ធាតុអាកាសចាប់ផ្តើមត្រជាក់ និងមានសំណើមខ្លាំង ធ្វើឱ្យមេរោគអាចរីករាលដាលបានយ៉ាងឆាប់រហ័ស បើសិនជាមានមេរោគរីករាលដាលនៅក្នុងធាតុអាកាស ហើយយើងដកដង្ហើមស្រូបចូលទៅក្នុងសួត អាចនឹងបង្កឱ្យកើតជំងឺខាងផ្លូវដង្ហើមបានជាច្រើន ដូចជា ជំងឺរលាកច្រមុះ ជំងឺផ្តាសាយ គ្រុនផ្តាសសាយធំ និងជំងឺរលាកបំពង់ដង្ហើម (រលាកបំពង់ក) ជាដើម។ តើអ្នកគួរថែរក្សាសុខភាពបែបណានៅក្នុងអំឡុងពេលនៃរដូវភ្លៀង?
ការប្រុងប្រយ័ត្ន និងអនាម័យ
ចៀសវាងការស្ថិតនៅក្នុងកន្លែងដែលចង្អៀតហប់ ខ្យល់អាកាសពិបាកចេញចូល និងចៀសវាងការនៅជិតអ្នកដែលកើតជំងឺទាំងអស់នោះ ព្រោះមេរោគអាចឆ្លងពីមនុស្សម្នាក់ទៅមនុស្សម្នាក់បានតាមរយៈការដកដង្ហើម ទឹកមាត់ សំបោរ ឬកំហាកស្លេស្មរបស់អ្នកជំងឺ ដោយមេរោគនឹងឆ្លងចូលតាមភ្នែក ច្រមុះ និងមាត់ ឬតាមរយៈការដែលមនុស្សបានប៉ះពាល់វត្ថុដែលលាយឡំជាមួយមេរោគ ដូចជា កន្សែងជូតមុខ ស្លាបព្រា កែវទឹក ការថើប ឬការដែលដៃទៅប៉ះមេរោគ ហើយយកទៅញីភ្នែក ឬយកទៅកាន់អ្វីញ៉ាំជាដើម។
រក្សាសីតុណ្ហភាពរាងកាយ
ប្រសិនបើមានអាការតឹងច្រមុះ ឬហៀរសំបោរ អ្នកគួរចៀសវាងនៅកន្លែងដែលមានអាកាសធាតុត្រជាក់ ជាពិសេសម៉ាស៊ីនត្រជាក់ កង្ហារ កុំញ៉ាំទឹកត្រជាក់ ឬងូតទឹកត្រជាក់ ហើយប្រសិនបើចង់បើកម៉ាស៊ីនត្រជាក់ ត្រូវកម្រិតសីតុណ្ហភាពឱ្យខ្ពស់ជាង25អង្សារ ដើម្បីកុំឱ្យខ្យល់ត្រជាក់ពេក។ ករណីប្រើកង្ហារ កុំបើកលេខខ្លាំងពេក គួរគេងឆ្ងាយពីម៉ាស៊ីនសម្រូបខ្យល់អាកាស ឬកង្ហារ ព្រោះខ្យល់ត្រជាក់ធ្វើឱ្យរាងកាយរបស់អ្នកទន់ខ្សោយ ប្រព័ន្ធការពាររាងកាយក៏ចុះខ្សោយ អាចនាំឱ្យអ្នកកើតមានអាការរលាកច្រមុះ រមាស់ច្រមុះ តឹងច្រមុះ កណ្តាស់ ហៀរសំបោរ បំពង់ខ្យល់រួម ឬក្អកមានស្លេសជាដើម។ គួរឱ្យរាងកាយបានកក់ក្តៅ ដោយគេងដណ្តប់ភួយ ពាក់ស្រោមជើង ពាក់អាវក្រាស់ៗ ឬពាក់អាវ2ជាន់ និងខោវែងផង។ ករណីសំបោរនៅក្នុងរន្ធច្រមុះច្រើន ឬតឹងច្រមុះ គ្រូពេទ្យអាចណែនាំឱ្យឆ្ពុងច្រមុះ ដោយចំហាយទឹកពុះ ដើម្បីជួយឱ្យអាការធូរស្រាលបាន។
គួររកមូលហេតុដែលនាំឱ្យឆ្លងរោគផ្លូវដង្ហើម
ប្រសិនបើអ្នកមានប្រព័ន្ធការពាររាងកាយល្អ នោះនឹងមិនងាយឈឺនោះទេ។ មូលហេតុផ្សេងៗដែលនាំឱ្យប្រព័ន្ធការពាររាងកាយចុះខ្សោយ មានដូចជា តប់ប្រមល់ គេងមិនគ្រប់គ្រាន់ ឬប៉ះជាមួយនឹងខ្យល់ត្រជាក់ពេក។
ការទទួលទានអាហារមិនបណ្ដាលឱ្យរលាកបំពង់ក
ប្រសិនបើមានអាការឈឺ-ក ឬក្រហាយផ្សា អ្នកគួរទទួលទានអាហារទន់ៗ ដូចជា បបរសាមចូក បបរក្តៅៗ ចៀសវាងអាហារហឹរពេក ប្រៃពេក កុំជក់បារី ឬសេពគ្រឿងស្រវឹង ចៀសវាងការប្រើប្រាស់សំឡេងមួយរយៈ សម្អាតមាត់ឱ្យបានញឹកញាប់ ជាពិសេសក្រោយពេលទទួលទានអាហារ ដោយធ្វើការដុះធ្មេញ ខ្ពុលមាត់ជាមួយទឹកអំបិលក្តៅឧណ្ណៗ ឬទឹកសុទ្ធព្រោះការដែលមិនសម្អាតមាត់ធ្មេញ និងបំពង់ ក កាន់តែធ្វើឱ្យរលាកខ្លាំងថែមទៀត។
ចៀសវាងអាហារ ឬទឹកត្រជាក់
បើមានអាការក្អួត គួរចៀសវាងភាពត្រជាក់ ដូចជា ខ្យល់អាការត្រជាក់ ការទទួលទានទឹកកក ឬងូតទឹកត្រជាក់ ការញ៉ាំការ៉េមជាដើម។ អ្នកគួរទទួលទាន ឬងូតទឹកក្តៅឧណ្ហៗ គួរបិទមាត់ច្រមុះ ពេលក្អក ឬកណ្តាស់ដោយក្រណាត់ស្អាត។
ផ្អាកសកម្មភាពមួយចំនួនដែលងាយធ្វើឱ្យឆ្លងមេរោគតាមផ្លូវដង្ហើម
បើមានអាការស្ងួតបំពង់-ក អ្នកគួរកាត់បន្ថយការប្រើសំឡេងជាបណ្តោះអាសន្ន ហើយអ្នកមិនគួរស្រែកខ្លាំងៗនោះទេ។ អ្នកគួរឈប់ជក់បារី ឬចៀសវាងឱ្យឆ្ងាយពីផ្សេងបារី ផ្អាកហែលទឹក ឬលេងជ្រមុជទឹក ព្រោះអាចឆ្លងរោគចូលទៅក្នុងប្រព័ន្ធផ្លូវដង្ហើមបាន។ អ្នកងាកមកថែទាំសុខភាពឱ្យបានមាំមួន ដោយទទួលទានអាហារដែលមានប្រយោជន៍គ្រប់5ប្រភេទក្រុម ទាំងបន្លែផ្លែឈើ និងចៀសវាងស្ថិតនៅក្នុងបរិយាកាសកុះករពេក មានធូលីដីហុយ ផ្សែងសារធាតុគីមី ជាតិពុលកខ្វក់ ឬមានការប្រែប្រួលសីតុណ្ហភាពឆាប់រហ័សពេកជាដើម។ អ្នកគួរនៅកន្លែងដែលមានខ្យល់អាកាសចេញចូលបានល្អ ហាត់ប្រាណរាល់ថ្ងៃ កុំអត់ងងុយ ទទួលទានទឹកក្តៅឱ្យបានញឹកញាប់ មិនថានៅពេលណា ឬទីកន្លែងណាក៏ដោយ អ្នកគួរនៅឱ្យឆ្ងាយពីអ្នកជំងឺផ្លួវដង្ហើម ដើម្បីចៀសវាងពីការឆ្លងមេរោគ ហើយពេលបានធូរស្បើយហើយ អ្នកក៏គួរប្រត្តិបត្តិតាមការណែនាំទាំងនេះ យ៉ាងតិច1សប្តាហ៍បន្ថែមទៀតផង ដើម្បីឱ្យជំងឺរបស់អ្នកបានជាសះស្បើយ100%៕
