តើអ្នកគិតថា អ្នកបានលាបម្សៅទ្រនាប់ និងម្សៅបិទបាំងស្នាមបានត្រូបតាមក្បួនហើយឬនៅ? ចម្លើយគឺសម្តៅលើ ការយកចិត្តទុកដាក់ការពារថែរក្សាផ្ទៃមុខ ដំណាក់កាលនៃការប្រើប្រាស់គ្រឿងតុបតែងមុខ ឬការពិនិត្យមើលឱ្យបានហ្មត់ចត់ជាដើម។ គិតមើលម្តងទៀត រួចសឹមឆ្លើយថា មែន ឬមិនមែន ហើយប្រសិនបើអ្នកចង់ដឹងថា ទង្វើនៃការតុបតែងមុខរបស់អ្នកត្រឹមត្រូវបានប៉ុណ្ណានោះសូមផ្ទៀងផ្ទាត់ជាមួយរបៀបនៃការលាបដ៏ត្រឹមត្រូវដូចខាងក្រោមនេះ៖
ចាប់ផ្តើមដោយការលាងសម្អាតដៃរបស់អ្នកឱ្យបានស្អាត ដើម្បីកុំឱ្យមានធូលីដី ឬមេរោគផ្សេងៗទៅប៉ះលើផ្ទៃមុខតាមរយៈដៃរបស់អ្នក ហើយវាក៏អាចធ្វើឱ្យអ្នកកើតមុនថែមទៀតផង។ ចំណុចបន្ទាប់ដែលអ្នកត្រូវធ្វើគឺសម្អាតផ្ទៃមុខ ដោយទឹកសម្អាតមុខ (toner) រួចបន្តដោយឡេផ្តល់ជាតិសំណើមបន្តិចទៅលើស្បែកមុខរបស់អ្នក។ ការធ្វើបែបនេះ គឺដើម្បីជួយការពារស្បែកមុខ និងជួយឱ្យការតុបតែងមុខមានសភាពដូចធម្មជាតិថែមទៀត។ ដំណាក់កាលបន្តមកទៀតគឺ ការលាបម្សៅបិទបាំងស្លាកស្នាម។ ក្រោមភ្នែក និងស្នាមតាមកន្លែងផ្សេងៗទៀតនៅលើផ្ទៃមុខគឺជាទីតាំងដែលអ្នកត្រូវការជំនួយពីម្សៅប្រភេទនេះ។ បន្ទាប់ពីបិទបាំងស្នាមផ្សេងៗរួច គឺជាពេលដែលអ្នកត្រូវលាបម្សៅទ្រនាប់។ បើអ្នកចង់ឱ្យការតុបតែងមុខរបស់អ្នក មើលទៅបែបធម្មជាតិនោះ សូមចាំពាក្យមួយឃ្លាថា “តិចកាលណាល្អកាលហ្នឹង”។ លាបម្សៅហុយពីលើភ្លាមៗ បន្ទាប់ពីលាបម្សៅទ្រនាប់រួច ដើម្បីឱ្យម្សៅជ្រាបចូលសាច់មុខល្អ និងមិនប្រតាក។ សម្រាប់ការតុបតែងភ្នែក បន្ថែមពណ៌ត្របកភ្នែក ពណ៌ថ្ពាល់ ឬក្រែមលាបមាត់ជាដើម ដែលជាដំណាក់កាលបន្តបន្ទាប់មកទៀតនោះ គឺអាស្រ័យទៅតាមចំណង់ចំណូលចិត្ត និងការនិយមរបស់អ្នក ប៉ុន្តែមុននឹងបញ្ចប់ការតុបតែងមុខ សូមពិនិត្យមើលផ្ទៃមុខរបស់អ្នកឱ្យបានច្បាស់នៅមុខកញ្ចក់(ឆ្លុះឱ្យជិត) ដើម្បីឱ្យប្រាកដក្នុងចិត្តថា ម្សៅទ្រនាប់នៅលើផ្ទៃមុខរបស់អ្នកជ្រាបចូលយ៉ាងល្អ ស្មើសាច់គ្នា ហើយផ្ទៃមុខរបស់អ្នកមិនបានលេចចេញនូវស្នាមណាមួយដែលមើលទៅមិនស្រស់ស្អាតនោះឡើយ៕
