ស្បែកម្រាមដៃ ក៏អាចបង្ហាញឱ្យឃើញពីភាពស្រស់ស្អាត និងភាពរុះរោយ(ចាស់តាមអាយុ)បានច្បាស់ មិនចាញ់ស្បែកផ្ទៃមុខប៉ុន្មានដែរ ដូច្នេះ ចូរកុំសង្កត់ធ្ងន់តែលើការថែរក្សាផ្ទៃមុខតែម្យ៉ាងពេក ហើយខាងក្រោមនេះ គឺជាវិធីសាស្ត្រងាយៗ ដែលអាចជួយឱ្យនារីៗយើង មានម្រាមដៃស្រឡូន ស្អាត សម៉ដ្ឋខៃ ទន់ល្មើយគួរឱ្យចង់ប៉ះ៖
1.កុំលាងដៃញឹកញាប់ពេក…ពិតប្រាកដណាស់ថា អ្នកត្រូវតែលាងដៃឱ្យបានញឹកញាប់ ដើម្បីការពារជម្ងឺផ្តាសាយធំ និងជាពិសេសជំងឺកូវីដ-19 តែកុំឱ្យញឹកញាប់ ហួសពីភាពចាំបាច់ពេកអី ព្រោះទឹកនឹងធ្វើឱ្យបាតដៃរបស់អ្នកឡើងស្ងួត។
2.កាត់បន្ថយការប្រើសាប៊ូ…ព្រោះសាប៊ូ វានឹងធ្វើឱ្យស្បែកឡើងស្ងួត កើតអាការផ្សាក្រហាយ និងធ្វើឱ្យស្បែកដៃ ឆាប់ចាស់មុនវ័យ។ ចូរជ្រើសរើសប្រើផលិតផលលាងដៃ ប្រភេទដែលផ្តល់នូវភាពស្រស់បស់ដល់ស្បែក ទើបជាការប្រសើរ។
3.លាបឡេឡូស្សឹន…រៀងរាល់លើក ក្រោយពេលលាងដៃរួច ដោយលាបខណៈដែលស្បែកនៅសើមៗ ដើម្បីប្រមូលភាពស្រស់បស់ ឱ្យជាប់មាននៅលើស្បែកម្រាមដៃជានិច្ច។
4.ការពារស្បែកម្រាមដៃ ពីពន្លឺថ្ងៃ…នារីៗយើង គួរលាបឃ្រីមការពារកម្តៅថ្ងៃជាប្រចាំ ពេលដែលត្រូវចេញទៅក្រៅផ្ទះ ហើយបើចង់ឱ្យល្អជាងនេះទៀតនោះ យើងគួរតែពាក់ស្រោមដៃធ្វើពីអំបោះ រៀងរាល់ពេលដែលអ្នកត្រូវបើកឡានចេញទៅខាងក្រៅ។
5.មើលថែទាំក្រចក…អ្នកគួរលាបប្រេង នៅលើស្បែកហ៊ុមក្រចករៀងរាល់យប់ រួចហើយលាងចេញ បន្ទាប់ពីងូតទឹកពេលព្រឹករួច។ វិធីនេះនឹងជួយឱ្យអ្នក មិនបាច់កាត់ស្បែកហ៊ុមក្រចកចេញ ព្រោះវាជារឿងដែលនារីៗយើងមិនគួរធ្វើឡើយ។
6.លាប ម៉យស៏ជើរ៉ាយស៊ើ ប្រភេទខាប់ នៅពេលយប់ ដើម្បីបង្កើនភាពស្អាតស្រស់ថ្លាជាពិសេស ដល់ម្រាមដៃ។
7.ខាត់ស្បែកដៃ…ប្រើស្ក្រាប់ ខាត់ស្បែកដៃជាប្រចាំ រៀងរាល់សប្តាហ៍ ដើម្បីកម្ចាត់កោសិកាស្បែក ដែលងាប់ហើយ ឱ្យវារបូតចេញអស់។
8.លាងក្រចក…លាងថ្នាំក្រចកចេញ បន្ទាប់ពីលាបរួចមកហើយ 7ថ្ងៃ រួចហើយទុកចោល ឱ្យក្រចកទំនេរ 2-3ថ្ងៃ ដើម្បីទុកជាការសម្រាក មុននឹងលាបថ្នាំឡើងវិញ
ម្តងទៀត៕
ដោយ អ្នកគ្រូ ឆវី
