វិធី​ផ្លុំ​សក់​ឱ្យ​ស្អាត និង​មិន​ខូច​សក់

បើ​និយាយ​ពី​រឿង​សក់​ក្បាល​វិញ ឧបករណ៍​ចាំបាច់​បំផុត ដែលនារីៗយើង​មិនអាច​ខ្វះ​បាន​នោះ​គឺ ប្រដាប់​ផ្លុំ​សក់ ព្រោះ​វា​ជា​ឧបករណ៍ ដែល​ជួយ​រៀបចំ​ទ្រង់ទ្រាយ​សក់ និង​សភាព​សក់​របស់​អ្នក​ឱ្យបាន​ស្អាត​ត្រឹមត្រូវ និង​ធ្លាក់​រំសាយ​ស្អាត បាន​តាមចិត្ត​ប្រាថ្នា​គ្រប់ពេលវេលា តែ​ទោះជា​បែប​ហ្នឹង​មែន​ក៏ដោយ ក៏​យើង​មិនអាច​បដិសេធ​បានឡើយ​ថា មានពេលខ្លះ​ការ​ផ្លុំ​សក់ ក៏​ធ្វើឱ្យ​អ្នក​មួម៉ៅ​បានដែរ ជាពិសេស​នៅពេល​សភាព​សក់ បន្ទាប់ពី​ផ្លុំ​រួច មិនបាន​ដូច​ចិត្ត​ប្រាថ្នា រហូតដល់​មាន​អ្នកខ្លះ ត្រូវយក​ទឹក​មក​លាប​សក់ ឱ្យ​សើម​ឡើងវិញ ហើយ​ផ្លុំ​ម្តងទៀត ក៏មានដែរ។

វិធី​ផ្លុំ​សក់ ឱ្យបាន​ទ្រង់ទ្រាយ​ស្អាត និង​មិន​ខូច​សក់ មាន​ដូចតទៅ៖

  1. បែង​សក់​ជាស្រទាប់ៗជាមុនសិន មុននឹង​ផ្លុំ

នារីៗជាច្រើន​នាក់ តែងតែ​ប្រើ​ប្រដាប់​ផ្លុំ​សក់ ផ្លុំ​ពីមុខ ពីក្រោយ ឆ្វេង-ស្តាំ ដោយ​មិនបាន​បែងចែក​សក់​ជាដំណាក់ៗឡើយ ធ្វើបែបនេះ លទ្ធផល​ដែល​ទទួលបាន គឺ​សក់​ក្បាល​ឡើង​សំពោង គ្មាន​របៀប និង​ពិបាក​សិត​ធ្វើ​ម៉ូដ។ ដូច្នេះ​ដើម្បី​កែ​បញ្ហា​នេះ អ្នក​គួរ​បែងចែក​សក់​ជាស្រទាប់ៗ មុននឹង​ផ្លុំ​ឱ្យ​ស្ងួត​ម្តងបន្តិចៗ នឹងធ្វើ​ឱ្យ​សក់​មាន​ទ្រង់ទ្រាយ​ស្អាត ហើយ​ធ្លាក់​ត្រង់​រំសាយ​ល្អ។

  1. ត្រូវ​អង្គុយ​ពេល​ផ្លុំ​សក់

ចំណុច​នេះ ដូចជា​មិនមាន​ពាក់ព័ន្ធ​នឹង​សក់​ស្អាត ឬ​មិន​ស្អាត​បន្តិច​ណា​សោះ តែ​វា​ក៏មាន​ចំណែក​រួមមួយ យ៉ាង​មិន​គួរឱ្យ​ជឿ​ដែរ ព្រោះ​ការ​ស្ថិតក្នុង​ឥរិយាបថ​ដែល​មិន​ទំនង ដូចជា​ការ​ឈរ​ផ្លុំ​សក់​ជាដើម នឹងធ្វើ​ឱ្យ​អង្សា​របស់​ប្រដាប់​ផ្លុំ​សក់​នោះ​ប្រែប្រួល និង​ធ្វើឱ្យ​លទ្ធផល​ចេញមក មិនបាន​ដូច​ចិត្ត​ប្រាថ្នា​ប៉ុន្មាន​ឡើយ ដូច្នេះនារីៗយើង គួរ​អង្គុយ​ក្នុងស្ថានភាព​ណា ដែល​គិត​ស្រួលខ្លួន​បំផុត ដើម្បីឱ្យ​ងាយស្រួល​ក្នុង​ការចាប់​ប្រដាប់​ផ្លុំ​សក់ ដែល​នឹង​ធ្វើឱ្យ​អ្នក អាច​រៀបចំ​តែង​ទម្រង់​សក់ បាន​តាមចិត្ត​ត្រូវការ ថែមទាំង​មិន​ធ្វើឱ្យមាន​អារ​ម្ម​ណ៏​ចុក​រួយ​រាងកាយ​ទៀតផង។

  1. កាន់​ក្រាស​ធ្មេញ​មូល ដោយ​ដៃ​ខាង​ណា​ដែល​ថ្នឹក

ខណៈពេលដែល​អ្នក​ផ្លុំ​សក់ ដើម្បីឱ្យ​សក់ត្រង់​ធ្លាក់​រំសាយ​នោះ អ្នក​ចាំបាច់​ត្រូវ​ប្រើ​ដៃ​ខាង​ណា ដែល​អ្នក​ថ្នឹក​កាន់​ក្រាស ដើម្បី​កំណត់​កន្លែង​ដែល​អ្នក​ចង់​ផ្លុំ តែបើ​អ្នក​កាន់​ក្រាស ដោយ​ដៃ​ខាង​ដែល​អ្នក​មិនសូវ​ថ្នឹក​នោះ អ្នក​ច្បាស់​ជា​មិនអាច​ប្រើប្រាស់​វា បានល្អ​ដូច​ចិត្ត​ចង់​ឡើយ ហេងស៊យ សក់​ក្បាល​របស់​អ្នក អាច​ឡើង​បះ​សំពោង​បាន​ផង​ក៏​មិនដឹង។

  1. កុំ​មួល​ក្រាស ខណៈពេល​សិតសក់​ផ្លុំ

ទោះជា​ក្រាស​សម្រាប់​សិតសក់​ពេល​ផ្លុំ​នោះ មាន​រូបរាង​មូល​មែន តែ​ក្នុងពេល​ផ្លុំ​នោះ អ្នក​គួរ​កាន់​ក្រាស​ឱ្យ​នឹង​ដៃ ហើយ​សិត​រំ​កឹ​លវាសន្សឹមៗចុះ ព្រម​គ្នា​ជាមួយនឹង​ប្រដាប់​ផ្លុំ​សក់ តាំងពី​គល់​រហូតដល់​ចុង និង​គួរ​មួល​ក្រាស​បន្តិច ពេលមកដល់​ចុង​សក់ ដើម្បីឱ្យ​សក់​កោង​ស្អាត​ដូច​ធម្មជាតិ មិន​ត្រង់ភ្លឹង​ជ្រុល​ពេក។

  1. កុំ​សិត​ទាញខ្លាំងៗខណៈពេល​ផ្លុំ

ព្រោះ​លទ្ធផល ដែល​ទទួលបាន គឺ​សក់​មិន​រាបស្មើ ហើយ​ត្រង់ភ្លឹង​ដូច​បន្ទាត់ មិន​ស្អាត​ដូច​ធម្មជាតិ ក្រៅពីនោះ នៅ​ធ្វើឱ្យ​ផ្ទៃមុខ មើលទៅ​ឃើញ​ធំ​ឡើង​ទៀតផង។

  1. កុំ​យក​ប្រដាប់​ផ្លុំ សង្កត់​លើស​ក់ ឬ​ភ្ជង់​ផ្អឹប​លើស​សៃ​សក់ខ្លាំងៗពេក

ចំណុច​នេះ ច្រើនតែ​ត្រូវ​ប្រតិបត្តិ ដំណាលគ្នា​នឹង​ការ​សិត​ទាញ​សក់​ចុះខ្លាំងៗ តែ​វា​មិនមែនជា​រឿង​ល្អ​ទេ ព្រោះ​ក្រៅពី​កម្ដៅ ធ្វើឱ្យ​សក់​ខូច​ហើយ នៅ​ធ្វើឱ្យ​សរសៃសក់ សំប៉ែត​រាប​ទៀតផង ដូច្នេះនារីៗយើង​ត្រូវ​ប្រយ័ត្ន​ចំណុច​នេះ​ឱ្យ​មែនទែន។

  1. មុន​ផ្លុំ គួររៀបចំ​ទ្រង់ទ្រាយ​សក់ ឱ្យបាន​ស្អាត​ជាមុនសិន

រួចហើយ​សឹម​យក​ប្រដាប់​ផ្លុំ មក​ផ្លុំ​លើ​សក់​យ៉ាងសន្សឹមៗ ដោយ​ប្រយ័ត្ន​កុំឱ្យ​ខូច​ទ្រង់ទ្រាយ​សក់​ដែល​បានរៀបចំ​ទុក​ហើយ​នោះ។

  1. កុំ​ភ្ជង់​ផ្លុំ តែមួយ​កន្លែង

ការ​ផ្លុំ​សក់​ដែល​ល្អ គួរ​ផ្លុំ​ដោយ​បង្អូស តាំងពី​គល់​ទៅដល់​ចុង​សក់ ដោយ​រំកិល​ប្រដាប់​ផ្លុំ​ឱ្យ​បានជា​បន្តបន្ទាប់ ព្រោះ​វា​ធ្វើឱ្យ​សក់​មិន​ខូច និង​មើលទៅ​ស្អាត​ដូច​ធម្មជាតិ ខ្លាំង​ជាង​ការភ្ជង់​ផ្លុំ​តែមួយ​កន្លែង។

  1. កុំ​ផ្លុំ​សក់​លឿន​ជ្រុល​ពេក

នារីៗជាច្រើន ពេល​ប្រញាប់ ច្រើនតែ​ប្រញាប់​ផ្លុំ​បែប​ឱ្យតែរួចៗ ដោយ​កាន់​ផ្លុំ​តែមួយ​កន្លែង ឬ​រលាស់​ទៅមក​ពេញ​សក់ ដែល​ការ​ផ្លុំ​បែបនេះ គ្មាន​ទទួលបាន​ផល​ល្អ​បន្តិច​ណា​ឡើយ។ អ្វីដែល​អ្នកទទួលបាន​នោះ​គឺ សក់​ដែល​ស្ងួត​តែប៉ុណ្ណោះ ហើយ​វា​នឹង​ចង្អុល​ចុះ​ត្រង់ភ្លឹង គ្មាន​ទ្រង់ទ្រាយ។ ដូច្នេះ​បើនារីៗចង់បាន​សក់​ដែល​ស្រស់ស្អាត​ល្អ​នោះ ត្រូវធ្វើ​ចិត្ត​ឱ្យត្រជាក់ៗបន្តិច កាន់​ប្រដាប់​ផ្លុំ​សក់ ក្នុង​កម្ពស់​ដែល​សមល្មម ហើយ​រំ​កឹ​ល​ផ្លុំសន្សឹមៗ ទៅតាម​ស្រទាប់​សក់​មួយដំណាក់ៗវិញ ល្អ​ជាង។

  1. មិនគួរ​ផ្លុំ​យកបែប​ស្ងួតល្មមៗឡើយ

ឬ​ហៅ​បែបងាយៗថា ផ្លុំ​សក់​មិនទាន់រួច ដោយ​ទុកឱ្យ​សក់​នៅ​សើម ហើយ​ដើរ​ចេញពីផ្ទះ​ទៅ​យ៉ាង​សប្បាយចិត្ត។ ប្រាកដ​ណាស់​ថា ពេលដែល​សក់​នៅ​សើម អ្នក​អាច​គិតថា វា​ស្អាត និង​មើលទៅ​ឃើញ​រៀបរយ​ល្អ តែ​ពេលណា​ដែល​វា​ស្ងួត​វិញ​នោះ វា​ច្បាស់​ជា​ចង្អុល​ត្រង់ភ្លឹង​មិន​ខាន ដូច្នេះ​មុន​ចេញពីផ្ទះ​គ្រប់ពេល សុំឱ្យ​ច្បាស់​នៅក្នុង​ចិត្ត​ខ្លួនឯង​ថា បាន​ផ្លុំ​សក់​ស្ងួត​ល្អ​ត្រឹមត្រូវ​ហើយ នោះ​ទើប​វា​ប្រសើរ​ជាង៕

Advertisement