- បុរស ងាយមានស្នេហាជាងនារី៖ យើងច្រើនតែមានអារម្មណ៍ និងគិតថា នារីៗច្រើនតែប្រញាប់ចង់បានស្នេហាណាស់ តែការពិតវិញ គឺបុរសៗទៅវិញទេ ដែលមានចរិតនិស្ស័យបែបហ្នឹងច្រើនជាងនារី ដោយសារតែ “ខួរក្បាលរបស់បុរស មានបំពាក់ប្រព័ន្ធប្រសាទទាក់ទងនឹងការមើលឃើញច្រើនជាងនារី” ដូច្នេះហើយទើបកំលោះៗ ពេលបានឃើញក្រមុំណាម្នាក់ ដែលធ្វើឱ្យគេមានអារម្មណ៍ជាមួយនោះ នឹងមានកម្លាំងថាមពលម្យ៉ាងទៅជំរុញកន្លែងពិសេសមួយរបស់ខួរក្បាល ដែលមានតែក្នុងមនុស្សភេទប្រុសប៉ុណ្ណោះ។
- (សម្រាប់នារី) មនុស្សប្រុសដែលយើងត្រូវចិត្ត មិនមែនមានតែម្នាក់គត់នោះទេ៖ ដូច្នេះ បើសិននារីណាម្នាក់គិតថា អ្នកបានធ្វើឱ្យគូស្នេហ៍ របូតពីដៃទៅហើយនោះ ចូរកុំទៅសោកស្តាយធ្វើអី ព្រោះពិភពលោកនេះ ពោរពេញទៅដោយមនុស្សប្រុស ដែលអាចធ្វើឱ្យយើងត្រូវចិត្តបាន មានច្រើនណាស់។ ចូរកុំភ្លេចថា “មូលហេតុដែលធ្វើឱ្យនារីយើងកើតទុក្ខព្រោះរឿងស្នេហា ដោយសារតែមកពីពួកនាងគិតថា នៅលើពិភពលោកនេះ មានបុរសតែម្នាក់គត់ ដែលទេវតាសាងឡើងមកដើម្បីរូបនាង” តែការពិត មិនមែនទេ…។
- ស្នេហា ពេលខ្លះនៅឆ្ងាយពីគ្នាម្ដងម្កាល ក៏ល្អដែរ៖ ខណៈពេលដែលអ្នកកំពុងតែឈ្លក់នឹងស្នេហាយ៉ាងងប់ងល់នោះ រឿងដែលអ្នកតែងចង់ធ្វើបំផុតនោះគឺ នៅនែបនិត្យ យកចិត្តយកថ្លើមគេ និងចង់នៅតោងស្អិត ជាប់ជិតនឹងគេ រហូតទាំងយប់ទាំងថ្ងៃ តែការពិតវិញ “ការនៅឆ្ងាយពីគ្នាខ្លះ វានឹងធ្វើឱ្យសារធាតុគីមីនៃស្នេហា ដែលមានដូចជា ដូផាមីន និងណូរេហ្វហ្វ៊ីន នៅក្នុងខួរក្បាលយើង រីកសាយភាយឡើងច្រើន ធ្វើឱ្យយើងកាន់តែស្រឡាញ់គ្នាឡើង។
- ស្នេហាបែប ឃើញភ្លាម ស្រឡាញ់ភ្លែត មានពិតប្រាកដមែន៖ វាជារឿងមួយ ដែលអាចទៅរួចពិតមែន ក្នុងការដែលយើងនឹកចង់ស្រឡាញ់មនុស្សម្នាក់ ដែលយើងទើបតែមើលឃើញមួយភ្លែតដំបូង…។ “ខាងកាយសាស្ត្រ សត្វត្រូវស្វែងរកគូឱ្យបាន មុនពេលរដូវបង្កាត់ពូជត្រូវបញ្ចប់ទៅវិញ ដូច្នេះហើយទើបការត្រូវភ្នែក ត្រូវចិត្តគ្នាដោយក្ដីស្នេហា វាកើតឡើងយ៉ាងឆាប់រហ័សនោះ។ នៅពេលដែលខួរក្បាលយើងបញ្ជូនព័ត៌មានមកបែបហ្នឹង យើងក៏អាចតបស្នងទៅប្រព័ន្ធជំរុញការស្រឡាញ់ ធ្វើឱ្យភាសាកាយ និងភាពត្រូវរ៉ូវគ្នា កើនឡើងយ៉ាងឆាប់រហ័ស។
- ស្នេហា មិនមែនជារឿងរបស់អារម្មណ៍ទេ៖ សេចក្តីស្នេហា បានទៅជំរុញខួរក្បាល ផ្នែកដែលមានសម្ព័ន្ធជាមួយនឹងការទន្ទឹងចាំ និងឆ្ពោះទៅរកកម្លាំងបណ្តាលចិត្ត និងកម្លាំងរុញច្រាន ដែលផ្ទុញគ្នាស្រឡះពីខួរក្បាលផ្នែកអារម្មណ៍ ដែលមានដូចជាសេចក្តីសុខ ឬភាពសោកសៅ ជាដើមនោះ ។ ដូច្នេះ ពេលនេះយើងបានដឹងហើយថា ហេតុអ្វីបានយើងចេះតែរសាប់រសល់ក្នុងចិត្តយ៉ាងចម្លែក ជាមួយមនុស្សម្នាក់ ដែលធ្វើឱ្យជីពចររបស់យើងលោតញាប់ ដោយសារតែត្រូវចិត្តគេនោះ។
- ស្នេហា គឺជាគ្រឿងញៀន៖ ពេលយើងមើលរូបថតអតីតគូស្នេហ៍ ផ្នែកមួយរបស់ខួរក្បាល ដែលពាក់ព័ន្ធនឹងការជក់ចិត្តដិតអារម្មណ៍ បានធ្វើការខ្លាំងជាពិសេសតែម្តង…អ័រម៉ូនដូផាមីន ត្រូវបានបញ្ចេញមក ហើយយើងក៏មានអារម្មណ៍រំភើប ដួងចិត្តញាប់ញ័រ អណ្តែតអណ្តូងយ៉ាងខ្លាំង ដូចគ្នានឹងការប្រើប្រាស់ថ្នាំញៀនដែរ នោះហើយ គឺជាមូលហេតុដែលធ្វើឱ្យយើងនឹកស្រមើស្រមៃ ទៅដល់គូស្នេហ៍សំណព្វចិត្តរបស់យើងនោះ៕
Advertisement
