បើទោះជា Covid-19 កំពុងតែរាតត្បាតយ៉ាងខ្លាំងក្លា និងយ៉ាងស្មុគស្មាញក៏ដោយ ក៏ក្រុមពលរដ្ឋនៅប្រទេសឥណ្ឌា ចំនួនរាប់ពាន់នាក់ នៅតែទៅចូលរួមពិធីបុណ្យសពរបស់អាចារ្យមួយរូបនៃប្រទេសនេះ។
ប៉ូលិសស្រុក Budaun នៃរដ្ឋ Uttar Pradesh បង្កើតក្រុមស្រាវជ្រាវមួយដើម្បីស៊ើបអង្កេតករណីមនុស្សរាប់ពាន់នាក់ប្រមូលផ្ដុំគ្នានៅលើដងផ្លូវ កាលពីថ្ងៃអាទិត្យ (9/ឧសភា) ដើម្បីធ្វើពិធីបុណ្យសពជូនអាចារ្យ Abdul Hamid Mohammad Salimul Qadri ដែលនេះ បានរំលោភលើវិធានការទប់ស្កាត់ Covid-19 របស់ប្រទេសឥណ្ឌា។
វីដេអូដែលត្រូវបានបង្ហោះលើបណ្ដាញសង្គម បានបង្ហាញឱ្យឃើញថា អ្នកចូលរួមពិធីបុណ្យសពនេះ ភាគច្រើនមិនបានពាក់ម៉ាសនោះទេ។ នៅពេលមើលពីលើអាកាស ហ្វូងមនុស្សប្រជ្រៀតគ្នា ហើយហាក់មិនមានបរិយាកាសដែលអាចដកដង្ហើមបានស្រួល។
មន្ត្រីនគរបាលមួយរូប ដែលស្ថិតក្នុងក្រុមស៊ើបអង្កេត បាននិយាយថា៖ «ហ្វូងមនុស្សរាប់ពាន់នាក់ បានដង្ហែក្បួនតាមដងផ្លូវក្នុងតំបន់ Budaun។ មនុស្សជាច្រើន មិនបានពាក់ម៉ាស»។
ពលរដ្ឋម្នាក់នៅក្នុងតំបន់ខាងលើ បាននិយាយថា៖ «សមត្ថកិច្ចក្នុងតំបន់ មិនបានដាក់របងរាំងខ្ទប់នោះទេ ក្នុងរយៈពេលប៉ុន្មានថ្ងៃចុងក្រោយនេះ។ បើសិនជាមានការគ្រប់គ្រងបានល្អ និងទាន់ពេល នោះហេតុការណ៍នេះនឹងមិនអាចកើតឡើងបានឡើយ»។
យោងតាមសារព័ត៌មាន The Print (ឥណ្ឌា) Qadri ដែលជាអាចារ្យមួយរូបដ៏ល្បីឈ្មោះប្រចាំតំបន់ Budaun បានទទួលមរណភាពកាលពីព្រឹកថ្ងៃទី6 ខែឧសភា បន្ទាប់ពីបានព្យាបាលជំងឺអស់មួយរយៈពេលយូរ។ មុនពេលពិធីបុណ្យសពត្រូវបានធ្វើឡើង សាកសពរបស់លោកត្រូវបានតម្កល់នៅក្នុងវិហារអ៊ីស្លាមមួយកន្លែង។ ក្រោយពីមានដំណឹងស្ដីពីមរណភាពនេះ អ៊ីស្លាមសាសនិកពីតំបន់ជាច្រើនរបស់ Budaun និងតំបន់ក្បែរខាង បាននាំគ្នាមកចូលរួមជូនដំណើរជាលើកចុងក្រោយ។
មន្ត្រីស៊ើបអង្កេតនៃក្រុមស្រាវជ្រាវរបស់ប៉ូលិសឥណ្ឌា បានឱ្យដឹងថា បច្ចុប្បន្ន ក្រុមស្រាវជ្រាវ «កំពុងពិនិត្យមើលវីដេអូបង្ហាញពីពិធីបុណ្យសព ដើម្បីកំណត់អត្តសញ្ញាណក្រុមមនុស្សដែលបានចូលរួម»។
តួលេខអ្នកវិជ្ជមាននឹង Covid-19 នៅក្នុងរដ្ឋ Uttar Pradesh បានថយចុះក្នុងអំឡុងច្រើនថ្ងៃចុងក្រោយនេះ ប៉ុន្តែ នៅតែមានកម្រិតខ្ពស់ ពោលគឺជាង 20,000នាក់ ក្នុងមួយថ្ងៃ។ ទូទាំងប្រទេសឥណ្ឌា បច្ចុប្បន្ន មានអ្នកវិជ្ជមាននឹងវីរុសនេះ សរុបចំនួន 23,340,426នាក់ ក្នុងនោះមានអ្នកស្លាប់សរុប 254,225នាក់ និងអ្នកជំងឺកំពុងព្យាបាល មានចំនួន 3,709,551នាក់៕
ប្រភព៖ The Print
ប្រែសម្រួល៖ បុត្រា
