បញ្ហាសុខភាពជារឿងមួយ ដែលមនុស្សយើងគិតគូរខ្លាំងណាស់នាពេលបច្ចុប្បន្ននេះ យើងអាចសង្កេតឃើញបាន តាមរយៈពេលធ្វើបុណ្យសុំពរ ឬក៏ជូនពរគ្នាទៅវិញទៅមកជាដើម ពាក្យថា “សូមឱ្យមានសុខភាពរឹងមាំ” តែងបានឮជាប់ជានិច្ច។ ថ្មីៗនេះ ទស្សនាវដ្តីសុខភាព H to H Magazine របស់សហរដ្ឋ អាមេរិក បានសរសេអត្ថបទសុខភាពមួយ ដែលមានចំណងជើងថា “គន្លឹះ 9យ៉ាងដើម្បីសុខភាពល្អ” ដែលយើងសូមនាំមកជម្រាបជូនប្រិយមិត្តអ្នកអានជាបន្ត ដើម្បីសាកល្បងអនុវត្តតាម ព្រោះមិនមែនជារឿងពិបាកឡើយ ដើម្បីមានសុខភាពល្អ។
1. ផ្លែប៉ោម 1ថ្ងៃ 1ផ្លែ
ពាក្យស្លោកដែលថា An apple a day , keeps doctor away គឺជារឿងត្រឹមត្រូវជានិច្ច។ តាមរយៈការសិក្សាស្រាវជ្រាវរបស់មហាវិទ្យាល័យឡុនដុន បានរកឃើញថា ការទទួលទានផ្លែប៉ោម 1ថ្ងៃ 1ផ្លែ នឹងធ្វើឱ្យការធ្វើការងាររបស់សួត កាន់តែល្អប្រសើរឡើង។ ដោយសារ អ៊ែនទីអុកស៊ីឌែនត៍ និងសារធាតុដែលមាននៅក្នុងផ្លែប៉ោម ហៅថា Quercetin នឹងជួយធ្វើឱ្យសួតយើងរឹងប៉ឹង និងធ្វើការបានយ៉ាងត្រឹមត្រូវ។
2. ដកដង្ហើមវែងៗ
យើងគួរដកដង្ហើមឱ្យបានវែងៗ ដើម្បីពង្រីកការធ្វើការងាររបស់សួត និងធ្វើឱ្យរាងកាយបានទទួលអុកស៊ីហ្ស៊ែនយ៉ាងគ្រប់គ្រាន់ផង តែរៀងរាល់ថ្ងៃនេះ យើងច្រើនតែដកដង្ហើមខ្លីៗ ដោយសារតែធ្វើការនៅក្នុងកន្លែងតូច ហប់ ឬអាចមកពីមិនបានដឹង ក៏អាចថាបានដែរ ដូច្នេះហើយ ក្នុង 1ថ្ងៃៗចូរសាកល្បងដកដង្ហើមវែងៗ ឱ្យបានយ៉ាងតិចណាស់ ក្នុង 1ថ្ងៃ 10ដង ដោយត្រូវដកដង្ហើមចូលឱ្យពោះឡើងប៉ោង និងដកដង្ហើមចេញវិញ ឱ្យពោះផតទៅវិញ ទើបត្រឹមត្រូវតាមវិធី។
3. ចៀសវាងការយកបន្លែ ចូលទៅដាក់ចម្អិនក្នុងឆ្នាំងម៉ៃក្រូវេហ្វ
តាមរយៈការស្រាវជ្រាវវិភាគរបស់ប្រទេសអេស្ប៉ាញ បានរកឃើញថា ការចម្អិនបន្លែឱ្យឆ្អិននៅក្នុងឆ្នាំងម៉ៃក្រូវេហ្វ នឹងធ្វើឱ្យសារជាតិអាហារបាត់បង់អស់ ដល់ទៅ 97% ដូច្នេះហើយ ពេលខ្លះ យើងគួរជ្រើសរើសទទួលទានបន្លែស្រស់ខ្លះ ទើបជាការប្រសើរ។
4. កម្រើកខ្លួនជានិច្ច
អ្នកដែលកម្រើកខ្លួន ឬធ្វើចលនាជាប់ជានិច្ច នឹងមានប្រព័ន្ធរំលាយអាហារល្អជាងអ្នក ដែលគិតតែអង្គុយនៅមួយកន្លែង។ វិធីនេះជួយការពារអាការចុកឆ្អល់ពោះ រួមទាំងរោគពុកឆ្អឹងទៀតផង។
5. ប្រយោជន៍របស់ទឹកដូង
ទឹកដូង គឺជាទឹកផ្លែឈើ ដែលល្អបំផុត 1ប្រភេទ មានសារធាតុរ៉ែ ដែលរាងកាយត្រូវការ គ្រប់ទាំងអស់ ដូចជា ប៉ូតាស្យូម ដែក សូដ្យូម កាល់ស្យូម ផូស្វ័រ អាស៊ីតអាមីណូ និងវិតាមីនB ហើយថែមទាំងមានជាតិស្ករគ្លុយខូស ដែលរាងកាយអាចបឺត យកទៅប្រើជាថាមពល បានភ្លាមតែម្តង មានសារធាតុខ្លាញ់ ដែលមានប្រយោជន៍ដល់រាងកាយ និងមានប្រយោជន៍ក្នុងការបណ្តេញសារជាតិពុល ចេញពីរាងកាយទៀតផង។
6. ពេលគ្រុនក្តៅខ្លួន មិនគួរញ៉ាំផ្លែត្របែកទេ
នៅក្នុងផ្លែត្របែកមាន រ៉ែប៉ូតាស្យូមខ្ពស់…នៅពេលគ្រុន រាងកាយនឹងមានសីតុណ្ហភាពឡើងខ្ពស់ ការទទួលទានអាហារដែលមានប៉ូតាស្យូមខ្ពស់ អាចនឹងហុចផលឱ្យកើតអាការប្រកាច់បាន។
7. ញ៉ាំផ្លែក្រូច ជួយបំបាត់អាការធុញទ្រាន់ នឿយណាយក្នុងចិត្តបាន
ការញ៉ាំផ្លែក្រូច ដោយបកសម្បកខ្លួនឯង នឹងបានធុំក្លិនក្រូច ដែលនឹងជួយឱ្យមានអារម្មណ៍ធូរស្រាល ហើយវិតាមីនC ដែលរាងកាយ បានទទួលពីផ្លែក្រូច ក្នុងបរិមាណដែលច្រើនគ្រប់គ្រាន់ នឹងជួយជំរុញឱ្យខួរក្បាល បញ្ចេញអ័រម៉ូនដែលធ្វើឱ្យបាត់ភាពធុញថប់តឹងតែងក្នុងចិត្តបានល្អទៀតផង ។
៨. ការញ៉ាំអាហារពេលព្រឹក ជួយការពាររោគភ្លេចភ្លាំង
អាហារពេលព្រឹក ជួយប្រឆាំងការបង្កកខ្លួនរបស់ឈាម ព្រោះឈាមនៅពេលព្រឹក នឹងងាយបង្កកខ្លួនជាងពេលផ្សេងទៀត ដូច្នេះគួរទទួលទានអាហារពេលព្រឹកឱ្យបានទៀងទាត់ ដើម្បីឱ្យខួរក្បាល ត្រូវបានឈាមហូរទៅចិញ្ចឹមបានយ៉ាងគ្រប់គ្រាន់ ខួរក្បាលនឹងបានភ្លឺថ្លា។
9. សូកូឡាខ្មៅ ប្រឆាំងសារធាតុរ៉ាឌីកាល់សេរី
តើមិត្តអ្នកអានដឹងទេថា សូកូឡាប្រភេទផ្សេងៗនោះ ស្ទើរតែគ្មានចំណែកផ្សំរបស់កូកូឡើយ មានតែសូកូឡាខ្មៅមួយប៉ុណ្ណោះ ដែលជាសូកូឡាសុទ្ធពិតប្រាកដ និងថែមទាំងមានប្រយោជន៍ដល់រាងកាយទៀតផង ព្រោះមានសារធាតុ Flavonoid ដែលជួយបង្កើនប្រព័ន្ធឈាមរត់ឱ្យកាន់តែល្អឡើង។ គួរញ៉ាំសូកូឡាខ្មៅ ក្នុង 1ថ្ងៃ ប្រមាណ កន្លះអនស៍៕
