នៅក្នុងគំនិតរបស់មនុស្សស្រីស្ទើរតែទាំងអស់គ្នា ថ្ងៃមករដូវម្តងៗអាចចាត់ទុកថាគឺជាពេលវេលាដែលគួរឱ្យធុញទ្រាន់បំផុត ព្រោះតែមានអារម្មណ៍ទើសទាល់ ពិបាកក្នុងការធ្វើចលនា មានអារម្មណ៍ស្អុះស្អាប់ ជាពិសេសគឺតែងតែមានការបារម្ភថាខ្លាចមានក្លិនមិនល្អភាយចេញមកខាងក្រៅ ដោយសារតែការប្រែប្រួលនៃអ័រម៉ូនផង និងឈាមរដូវផងនោះឯង។
បើដូច្នេះ ឡារ៉ែន គិតថា អត្ថបទមួយនេះនឹងក្លាយជាអត្ថបទដែលមានប្រយោជន៍បំផុតសម្រាប់ស្ត្រីទាំងឡាយដែលមានការព្រួយបារម្ភពីបញ្ហាមួយនេះ ព្រោះថាយើងនឹងប្រាប់អ្នកថាតើអ្នកគួរធ្វើយ៉ាងដូចម្តេចដើម្បីបំបាត់ចោលនូវក្លិនមិនល្អអស់ទាំងនោះ។
ងូតទឹកសម្អាតកាយ
នេះជារឿងចាំបាច់បំផុតដែលអ្នកត្រូវធ្វើ។ អ្នកប្រហែលជាមានការងារដែលត្រូវធ្វើក៏ពិតមែន ប៉ុន្តែក្នុងរយៈពេលប៉ុន្មានថ្ងៃនេះ អ្នកគួរតែឆ្លៀតពេលងូតទឹកសម្អាតកាយឱ្យបានច្រើនជាងពេលធម្មតាបន្តិច (អាច3ដងក្នុងមួយថ្ងៃ បើអ្នកមិនសូវមានពេល) ហើយរាល់ពេលងូតទឹកម្តងៗអ្នកត្រូវធ្វើការសម្អាតរាងកាយឱ្យបានស្អាតដោយសាប៊ូ ជាពិសេសនៅកន្លែងសំខាន់ៗមួយចំនួនដូចជា ប្រដាប់ភេទ (ព្រោះមានមេរោគច្រើន ហើយក៏មានក្លិនមិនល្អច្រើនដែរ) និងក្លៀកជាដើមដែលជាបណ្តុំនៃញើស និងបាក់តេរីផ្សេងៗដែលបង្កឱ្យមានក្លិនភាយចេញមកក្រៅ។
ការពារខ្លួនកុំឱ្យមានក្លិនភាយចេញមកក្រៅ
មិនថាវាជាក្លិនខ្លួន ឬក្លិនឆ្អាបនោះទេ គឺសុទ្ធតែត្រូវការការពារទុកជាមុន ដោយខាងតែបាន។ ស្ត្រីខ្លះអាចនឹងមានក្លិនខ្លួនភាយចេញមកនៅពេលមករដូវម្តងៗ ដូច្នេះបើមានវិធីការពារទុកជាមុនគឺជារឿងល្អមួយដែលអ្នកគួរតែធ្វើ។ ការប្រើសាជូរ សាប៊ូ កម្ចាត់រោមក្លៀកចេញ និងប្រើទឹកអប់បន្ថែមក្លិនក្រអូបជាដើម គឺជាវិធីងាយៗតែមានប្រសិទ្ធភាពក្នុងការជួយទប់ស្កាត់ក្លិនមិនល្អបាន។
ជ្រើសរើសសាច់ក្រណាត់សម្លៀកបំពាក់
សាច់ក្រណាត់អាវ និងខោទ្រនាប់ក្នុងដែលត្រូវស្លៀកក្នុងពេលវេលាបែបនេះ គួរតែជាសាច់ក្រណាត់ដែលដេរចេញពីសំឡីកប្បាស។ ការពាក់អាវរលុងៗ ក៏ដូចជាខោទ្រនាប់ដែលផលិតចេញពីសំឡីកប្បាសគឺដើម្បីឱ្យមានខ្យល់ចេញចូលបានល្អ មិនហប់ មិនក្តៅ ដែលធ្វើឱ្យបែកញើស ឬផ្អាប់ទុកនូវក្លិនមិនល្អ។
សំឡីអនាម័យ
និយាយដល់សំឡីអនាម័យ ឡារ៉ែន ដឹងច្បាស់ថា អ្នកនាងកញ្ញាទាំងឡាយពិតជាមានម៉ាកប្រចាំកាយដែលតែងតែប្រើជាប្រចាំហើយមែនទេ? ជាការពិតណាស់ប្រសិនបើអ្នករកឃើញម៉ាកណាមួយដែលអាចធ្វើឱ្យអ្នកមានអារម្មណ៍ថាស្រួលខ្លួនមិនប៉ះពាល់អីហើយនោះ គួរតែប្រើវាជាប្រចាំទៅ ព្រោះការផ្លាស់ប្តូរ ឬសាកល្បងម៉ាកថ្មីៗញឹកញាប់ពេកក៏មិនមានផលល្អចំពោះអ្នកដែរ។
ប្តូរសំឡីអនាម័យ
មិនមែនជារឿងលំបាកនោះទេដែលគ្រាន់តែដាក់សំឡីអនាម័យទៅតាមកាបូប ទុកសម្រាប់ធ្វើការផ្លាស់ប្តូរ ហើយការផ្លាស់ប្តូរនេះគួរតែធ្វើឡើងក្នុងរយៈពេល3 ឬ4ម៉ោងម្តង ព្រោះបើទុកយូរពេកវានឹងបង្កឱ្យមានក្លិនភាយចេញមកក្រៅបាន ឬអាចនឹងចម្លងមេរោគ ឬរលាកស្បែករបស់អ្នកថែមទៀតផង៕
