អ្នកថ្មើរជើងនៅតាមដងផ្លូវក្នុងទីក្រុង Shenzhen ប្រទេសចិន នាំគ្នារត់រកកន្លែងសុវត្ថិភាព នៅពេលអគារកម្ពស់ 355ម៉ែត្រ កំពុងញាប់ញ័រ បើទោះបីជាមិនមានហេតុការណ៍រញ្ជួយដីក៏ដោយ។
អគារ SEG Plaza ដែលជានិមិត្តរូបរបស់ទីក្រុង Shenzhen នៃខេត្ត Guangdong បានចាប់ផ្ដើមញាប់ញ័រនៅវេលាម៉ោងប្រហែល 13 ថ្ងៃ18 ខែឧសភា (ម៉ោងនៅកម្ពុជា) បណ្ដាលឱ្យមនុស្សរាប់ពាន់នាក់ ត្រូវជម្លៀសខ្លួនចេញទៅរកកន្លែងសុវត្ថិភាព។
ទាក់ទិននឹងបញ្ហានេះ វិស្វករ Lu Jianxin យល់ថា ឥទ្ធិពលរ៉េសូណង់ (resonance effect) ទំនងជាបានបណ្ដាលឱ្យអគារ SEG Plaza នៅទីក្រុង Shenzhen ត្រូវរង្គើញាប់ញ័រ ទោះជាមិនមានករណីរញ្ជួយដី។
«បើសិនជាមិនមានការរញ្ជួយដី ការញាប់ញ័ររបស់អគារ SEG Plaza គឺមិនមែនជាបញ្ហាធម្មតានោះទេ។ យោងតាមការវាយតម្លៃលើព័ត៌មានបច្ចុប្បន្ន នេះអាចជាការចៃដន្យនៃប្រេកង់ ពោលគឺ ឥទ្ធិពលរបស់រ៉េសូណង់» នេះបើតាមការយល់ឃើញរបស់ Lu Jianxin ប្រធានវិស្វករនៃក្រុមហ៊ុនវិទ្យាសាស្ត្រ និងបច្ចេកវិទ្យាសំណង់របស់ចិន។
អង្គភាពគ្រប់គ្រងស្ថានការណ៍អាសន្ននៃទីក្រុង Shenzhen ឱ្យដឹងថា ពុំមានការរញ្ជួយដីកើតឡើងនៅក្នុងទីក្រុងនេះ ក្នុងគ្រាដែលមានបាតុភូតខាងលើនោះទេ។ ចំណែកកម្លាំងខ្យល់វិញ ក៏ត្រូវបានរាយការណ៍ថា មានល្បឿនប្រហែល 27គម/ម៉ោង ដែលនេះមិនអាចធ្វើឱ្យអគារខ្ពស់ៗ ត្រូវញាប់ញ័រឡើយ។
វិស្វករ Lu Jianxin បន្ថែមថា គេត្រូវធ្វើការស៊ើបអង្កេតជាផ្លូវការ ទើបអាចរកឃើញមូលហេតុនៃបាតុភូតនេះ។ រីឯក្រុមអ្នកជំនាញវិញ បានឱ្យដឹងថា កម្រនឹងមានបញ្ហាអគារញាប់ញ័ររហូតដល់អាចឱ្យគេដឹងបានយ៉ាងដូច្នេះ។
Chen Wei អ្នកផ្គត់ផ្គង់ផ្នែករឹង (hardware) ដែលធ្វើការនៅ SEG Plaza ប្រាប់ថា គាត់មិនបានដឹងអំពីបញ្ហាអគារញាប់ញ័រនេះ ប៉ុន្តែ ត្រូវបានគេស្នើឱ្យចាកចេញពីអគារ ដើម្បីសុវត្ថិភាព។ ក៏ប៉ុន្តែ «មិត្តម្នាក់របស់ខ្ញុំដែលស្ថិតនៅក្នុងអគារ បានឃើញដបទឹកញាប់ញ័រ»។
SEG Plaza ដែលជាទីស្នាក់ការធំរបស់ក្រុមហ៊ុនអេឡិចត្រូនិក Shenzhen (SEG) មានកម្ពស់ 355ម៉ែត្រ និងមាន 79ជាន់ ត្រូវបានសាងសង់រួចរាល់កាលពីឆ្នាំ2020។ នៅក្នុងបញ្ជីចំណាត់ថ្នាក់ស្ដីពីកម្ពស់នៃអគារនៅទូទាំងពិភពលោក របស់ skyscrapercenter.com អគារ SEG Plaza ខ្ពស់ជាងគេលំដាប់ទី104 នៅប្រទេសចិន និងលំដាប់ទី212 នៅលើពិភពលោក។
«បាតុភូតញាប់ញ័រនេះ កំពុងត្រូវបានស្រាវជ្រាវដោយស្ថាប័នរដ្ឋមួយចំនួន ដើម្បីស្វែងរកមូលហេតុឱ្យបានច្បាស់លាស់» នេះបើតាមអង្គភាពគ្រប់គ្រងស្ថានការណ៍អាសន្ន៕
ប្រភព៖ SCMP
ប្រែសម្រួល៖ បុត្រា
