(ប៉ាគីស្ថាន)-ស្ត្រីមានផ្ទៃពោះម្នាក់នៅទីក្រុង Peshawar ត្រូវគ្រូបុរាណម្នាក់ដំដែកគោលប្រវែង ៥ ស.ម ទៅលើក្បាល ដើម្បី «ធានាថា កូនកើតមកនឹងជាកូនប្រុស» បើទោះជាបានដឹងថា ទារកក្នុងផ្ទៃគឺជាកូនស្រី។
វេជ្ជបណ្ឌិត Haider Khan នៅទីក្រុង Peshawar ភាគខាងជើងប្រទេសប៉ាគិស្ថាន ថ្ងៃនេះ (៩ កុម្ភៈ) បានឱ្យដឹងថា ស្ត្រីពពោះនេះបានមកកាន់មន្ទីរពេទ្យដើម្បីពិនិត្យ និងព្យាបាលរបួស បន្ទាប់ពីបានព្យាយាមប្រើប្រាស់ដង្កាប់ដកដែកគោលចេញពីក្បាល ប៉ុន្តែមិនបានសម្រេច។
«នាងនៅមានស្មារតីល្អ ប៉ុន្តែ មានការឈឺចាប់ខ្លាំង» វេជ្ជបណ្ឌិត Khan ដែលជាអ្នកវះកាត់យកដែកគោលពីក្បាលរបស់ស្ត្រីនោះ និយាយដូច្នេះ។
ស្ត្រីរូបនេះ មានកូនស្រី ៣ នាក់រួចហើយ និងកំពុងពពោះកូនស្រីទី ។ រូបភាពថតដោយកាំរស្មី X បានបង្ហាញថា ដែកគោលប្រវែង ៥ ស.ម ត្រូវបានដំទម្លុះត្រង់ថ្ងាស់ ប៉ុន្តែ សំណាងល្អណាស់ ព្រោះមិនប៉ះពាល់ដល់ខួរក្បាល។
វេជ្ជបណ្ឌិតនិយាយថា អ្នកដែលបានដំដែកគោលលើក្បាលស្ត្រីរូបនេះ ប្រាកដជាបានប្រើប្រាស់ពូថៅ ឬរបស់ធ្ងន់អ្វីមួយ។ ដំបូងឡើយ ស្ត្រីរងគ្រោះនិយាយថា នាងដំដែកគោលដោយខ្លួនឯងដោយធ្វើតាមសំដីរបស់គ្រូបុរាណ ប៉ុន្តែ ក្រោយមក នាងបានសារភាពថា គ្រូបុរាណនោះគឺជាអ្នកធ្វើរឿងនេះ ដើម្បី «ធានា» ថា នាងនឹងបង្កើតបានកូនប្រុស។
ស្ត្រីរងគ្រោះបានចេញពីមន្ទីរពេទ្យ ក្រោយពីបានព្យាបាលជាសះស្បើយ។ ប៉ូលិសតំបន់ Peshawar កំពុងរកវិធីទាក់ទងស្ត្រីរូបនេះដើម្បីកំណត់អត្តសញ្ញាណជនដៃដល់។
ជនជាតិប៉ាគីស្ថាន និងប្រទេសមួយចំនួននៅ អាស៊ីខាងត្បូង មានជំនឿថា កូនប្រុសនឹងធានាផ្នែកហិរញ្ញវត្ថុដល់ឪពុកម្ដាយបានល្អជាងកូនស្រី។ គ្រូបុរាណដែលព្យាបាលជំងឺដោយវិធីសាស្ត្រប្រឆាំងនឹងវិទ្យាសាស្ត្រ នៅតែកើតមានច្រើននៅឡើយ នៅក្នុង ប្រទេសប៉ាគីស្ថាន៕
