(ប្រទេសចិន)-មន្ត្រីនៅខេត្ត Guangxi បានដាក់ពិន័យលើមន្ត្រីថ្នាក់ស្រុក ១១ រូប ដោយសារខ្វះការទទួលខុសត្រូវ បណ្ដោយឱ្យប្ដីប្រពន្ធមួយគូ បង្កើតកូនបានរហូតដល់ ១៥ នាក់ ក្នុងរយៈពេល ២ ទសវត្សរ៍។
លោកតា Liang Er អាយុ ៧៦ ឆ្នាំ និងលោកអ្នកស្រី Lu Honglan អាយុ ៤៦ ឆ្នាំ នៅក្នុងភូមិក្រីក្រមួយក្នុងស្រុក Rong នៃខេត្ត Guangxi បង្កើតបានកូនប្រុស ៤ នាក់ និងកូនស្រី ១១ នាក់ ចាប់ពីឆ្នាំ ១៩៩៥ ដល់ ២០១៦ នេះបើតាមការឱ្យដឹងពីអាជ្ញាធរខេត្ត Guangxi កាលពីថ្ងៃទី ២០ មីនា ២០២២។
នោះគឺជាអំឡុងពេលដែលអាជ្ញាធរចិន អនុវត្តគោលនយោបាយកូនមួយយ៉ាងតឹងរ៉ឹង ហើយក្រោយមកក៏បានបន្ធូរបន្ថយ ដោយប្ដីប្រពន្ធ ១ គូ អាចបង្កើតកូនបាន ២នាក់។ បច្ចុប្បន្ន ប្រទេសចិន បានអនុញ្ញាតឱ្យគ្រួសារ ១ គ្រួ អាចបង្កើតកូនបាន ៣ នាក់ នៅក្នុងគ្រាដែលអត្រាបង្កើតកូនកំពុងថយចុះ និងអត្រាមនុស្សចាស់កើនឡើងខ្ពស់។
ក្រុមមន្ត្រីថ្នាក់ខេត្តរបស់ Guangxi សម្រេចចិត្តធ្វើការទិតៀន និងព្រមានចំពោះមន្ត្រីថ្នាក់ស្រុក ១១ រូប ដែលគ្រប់គ្រងតំបន់រស់នៅរបស់គ្រួសារខាងលើ ដោយយល់ថា ពួកគេបានបង្ហាញអំពីការមិនយកចិត្តទុកដាក់ មិនមានការទទួលខុសត្រូវនៅពេលគ្រប់គ្រងលិខិតស្នាមអាពាហ៍ពិពាហ៍ និងគ្រប់គ្រងប្រជាជនក្នុងករណីរបស់គ្រួសារលោកតា Liang។
លោកតា Liang និង អ្នកស្រី Lu មិនបានចុះសំបុត្រអាពាហ៍ពិពាហ៍នោះទេ ប៉ុន្តែ បានរស់នៅ និងមានកូនជាមួយគ្នា។ រឿងរ៉ាវនេះត្រូវបានបើកកកាយបន្ទាប់ពីមានការសង្ស័យថា អ្នកស្រី Lu ត្រូវបានចាប់បង្ខំឱ្យរៀបការដោយមិនស្របច្បាប់។
«ខ្ញុំបានរំលោភលើគោលនយោបាយផែនការគ្រួសារ ប៉ុន្តែ អាជ្ញាធរមិនបានបោះបង់ចោលខ្ញុំទេ។ សមាជិកទាំងអស់របស់គ្រួសារ បច្ចុប្បន្នទទួលបានជំនួយផ្នែកអប់រំ និងប្រាក់សម្រាប់គ្រួសារក្រីក្រ» លោកតា Liang បានប្រាប់សារព័ត៌មានកាលពីឆ្នាំ ២០១៨។
បច្ចុប្បន្ន កូនៗរបស់លោកតា Liang ធំឡើងដោយមានសុខភាពល្អ មានលិខិតស្នាមស្របច្បាប់ ហើយ ៤ នាក់ ក្នុងចំណោមកូនទាំង ១៥ នាក់ មានការងារធ្វើ ចំណែកក្រៅពីនេះ កំពុងនៅសិក្សា៕
