ប្រទេសថៃ បានអនុម័តលើរូបមន្តទីតាំងសាកល្បងមិនធ្វើចត្តាឡីស័ក ចំពោះភ្ញៀវទេសចរណ៍ដែលមកលេងកោះ Phuket ដែលនេះគឺជាជំហានដំបូងនៅក្នុងគោលដៅស្ដារសេដ្ឋកិច្ច ដែលបាន និងកំពុងដាំក្បាលចុះដោយសារតែ Covid-19។
គម្រោង «ប្រអប់ខ្សាច់ Phuket» ដែលអនុញ្ញាតឱ្យភ្ញៀវទេសចរណ៍ដែលបានចាក់វ៉ាក់សាំងបង្ការ Covid-19 រួចរាល់ ចូលមកកាន់តំបន់ទេសចរណ៍នេះ ដោយមិនចាំបាច់ធ្វើចត្តាឡីស័ករយៈពេល 2 សប្ដាហ៍ ដូចដែលបានកំណត់មុននេះ ទទួលបានការបើកភ្លើងខៀវពីសំណាក់មន្ត្រីរដ្ឋាភិបាលថៃ កាលពីថ្ងៃទី22 ខែមិថុនា។ គម្រោងនេះ នឹងត្រូវអនុវត្ត ចាប់ពីថ្ងៃទី1 ខែកក្កដា ឆ្នាំ2021។
Anucha Burapachaisri ដែលជាអ្នកនាំពាក្យរបស់រដ្ឋាភិបាលថៃ បានឱ្យដឹងថា គណៈរដ្ឋមន្ត្រីថៃ របស់នាយករដ្ឋមន្ត្រី Prayuth Chan-ocha បានគាំទ្រគម្រោងនេះ។
ក្រៅពីកោះ Phuket ក៏នៅមានទីតាំងទេសចរណ៍ជាច្រើនផ្សេងទៀត នឹងត្រូវដាក់ឱ្យដំណើរការសាកល្បងគម្រោងដូចខាងលើផងដែរ ក្នុងនោះមានដូចជា កោះ Samui, កោះ Phangan និងកោះ Tao ជាដើម ដែលសុទ្ធសឹងតែជាកោះដែលមានឆ្នេរខ្សាច់ស្រស់ស្អាត ទឹកថ្លាឈ្វេង និងពេញដោយកកម្ដៅថ្ងៃ។
ដើម្បីធានាថា គម្រោងខាងលើនេះ មិនជួបបញ្ហារអាក់រអួល ទីតាំងទេសចរណ៍ទាំងនេះ ត្រូវតែរក្សាអត្រានៃការឆ្លង Covid-19 ឱ្យនៅទាប ក្នុងនោះ Phuket មិនត្រូវបណ្ដោយឱ្យករណីឆ្លងវីរុសCovid-19 កើនលើសពី 90នាក់/សប្ដាហ៍។
«គិតមកដល់ពេលនេះ តួលេខអ្នកឆ្លង Covid-19 នៅ Phuket នៅតែអាចធានាបានចំពោះគម្រោង “ប្រអប់ខ្សាច់”» នេះបើតាម Taweesin Visanuyothin អ្នកនាំពាក្យរបស់គណៈកម្មការគ្រប់គ្រង Covid-19 របស់រាជរដ្ឋាភិបាលថៃ។
គម្រោង «ប្រអប់ខ្សាច់ Phuket» ត្រូវបានអាជ្ញាធរថៃស្នើឡើងតាំងពីខែមីនា ឆ្នាំ2021 ក្នុងគ្រាវិស័យទេសចរណ៍ ដែលធ្លាប់រួមចំណែកជិត 20% ទៅក្នុង GDP របស់ប្រទេសនេះ ត្រូវបានរុញច្រានដល់មាត់ជ្រោះ ដោយសារ Covid-19 ធ្វើឱ្យសេដ្ឋកិច្ចថៃ ធ្លាក់ទៅក្នុងស្ថានភាពអាក្រក់បំផុត រាប់ចាប់ពីវិបត្តិហិរញ្ញវត្ថុអាស៊ី កាលពីឆ្នាំ1997។
នាយករដ្ឋមន្ត្រីថៃ លោក Prayuth Chan-ocha កាលពីសប្ដាហ៍មុន បានឱ្យដឹងថា លោកមានគម្រោងបើកទ្វារប្រទេសទាំងស្រុងឡើងវិញ សម្រាប់ទទួលភ្ញៀវទេសចរណ៍បរទេស ចាប់ពីខែតុលា ឆ្នាំ2021 បន្ទាប់ពីបានចាក់វ៉ាក់សាំងជូនពលរដ្ឋ ឱ្យបានយ៉ាងតិច 50លាននាក់ក្នុងរយៈពេល 4ខែ។ ក៏ប៉ុន្តែ មកដល់ពេលនេះ ប្រទេសថៃ ទើបចាក់វ៉ាក់សាំងបានមិនដល់ 3% នៅឡើយ ក្នុងចំណោមពលរដ្ឋសរុប 70លាននាក់ ដែលនេះគឺជាអត្រាទាបបំផុតមួយ នៅក្នុងតំបន់អាស៊ីអាគ្នេយ៍៕
ប្រភព៖ AFP
ប្រែសម្រួល៖ បុត្រា
