តោះៗ !! នៅថ្ងៃនេះ សូមនាំអារម្មណ៍ប្រិយមិត្តទៅកម្សាន្ដទៅតំបន់ភូមិភាគឥសានប្រទេសថៃ ដែលកំពុងអំណោយផលអាកាសធាតុត្រដ៏ជាក់ និងអំណោយផលដល់រុក្ខជាតិដែលកំពុងចេញផ្ការីកស្គុសស្គាយ រំលេចបានជាទស្សនីយភាពដ៏ស្រស់ត្រកាសសម្រាប់ភ្ញៀវទេសចរ។
ដំណើរទៅកាន់តំបន់ទេសចរណ៍នោះ ភ្ញៀវទាំងអស់ត្រូវប្រើពេល 3 ម៉ោងក្នុងការចាកចេញពីទីក្រុងបាងកក។ នោះគឺ «សួនផ្កាឈូករ័ត្ន» ជាវាលកម្រាលព្រំពណ៌លឿងដ៏ធំធេងក្នុងទីក្រុង ណៈខនរ៉ាតស៊ីម៉ា ខេត្ត ណៈខនរ៉ាតស៊ីម៉ា កំពុងសម្ញែងសម្រស់ជាទីទាក់ទាញចំណាប់អារម្មណ៍ជនជាតិថៃយ៉ាងខ្លាំង។ តំបន់រមណីដ្ឋានចៃប្រឌិតបែបធម្មជាតិមួយនេះ ពិតជាស័ក្ដសមចំពោះការថតរូបជុំមិត្ដភក្ដិ ក្រុមគ្រួសារ និងគូសង្សារពេលបុណ្យឈប់សម្រាក។ វាជាឱកាសកម្សាន្ដរីករាយទៅកាន់ទីជនបទប្រទេសថៃ។
«សួនផ្កាឈូករ័ត្ន» នេះមានទំហំផ្ទៃដី 500 រ៉ៃ ត្រូវបានប្រែក្លាយជាទីឋានដ៏មានប្រជាប្រិយភាពមួយ ខណៈភ្ញៀវនាំគ្នាថតរូបបង្ហោះពេញបណ្ដាញសង្គមជាមួយផ្កាឈូករ័ត្ន កំពុងរីកព្រោងព្រាត។ នៅក្រៅឆ្ងាយពីក្រុងណៈខនរ៉ាតស៊ីម៉ា នៅមានសួនផ្កាឈូករ័ត្នប៉ុន្មានកន្លែងផងដែរ។ ផ្កាឈូករ័ត្ន វាជាដំណាំលើសពីអត្ថប្រយោជន៍គ្រាប់ និងប្រេង ព្រមទាំងគោលដៅទេសចរណ៍ថែមទៀត។ គួរបញ្ជាក់ដែរថា ក្នុងការមកកម្សាន្ដនៅក្នុង «សួនផ្កាឈូករ័ត្ន» ដ៏ធំល្វឹងល្វើយដាច់កន្ទុយភ្នែកមួយនេះ ភ្ញៀវទេសចរត្រូវទិញសំបុត្រចូលកម្សាន្ដ ដែលមានតម្លៃ 20 បាត៕
