ស្ថិតក្នុងវិបត្តិ Covid-19 វិស័យនានាបានរងផលប៉ះពាល់យ៉ាងខ្លាំង ជាពិសេសគឺវិស័យទេសចរណ៍ ព្រោះការចរាចរណ៍នៅគ្រប់ទីកន្លែងក្នុងពិភពលោកត្រូវបានរឹតត្បិត ស្របពេលដែលប្រជាជនជាច្រើនមានបញ្ហាហិរញ្ញវត្ថុ។
ស្របពេលជាមួយគ្នានេះដែរ បើតាម ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា សម្រាប់ខែកក្កដា ឆ្នាំ2020នេះ ភ្ញៀវទេសចរផ្ទៃក្នុងដែលបានធ្វើដំណើរកម្សាន្តទៅគ្រប់គោលដៅទេសចរណ៍ទូទាំងប្រទេសមានចំនួនសរុប 740,028នាក់ កើនឡើង 15.2% បើប្រៀបធៀបនឹងខែមិថុនា ក្នុងនោះមានភ្ញៀវជាតិប្រមាណ 723,238នាក់កើនឡើង 15.39% និងភ្ញៀវបរទេសមាន 16,790នាក់ កើនឡើង 9.99%។
តាមរយៈក្រសួងទេសចរណ៍បានបង្ហាញថា ក្នុងខែកក្កដានេះ ចំនួនភ្ញៀវទេសចរផ្ទៃក្នុងបានកើនឡើងដល់ជាង 75ម៉ឺននាក់ គឺស្មើនឹងប្រមាណ 75% នៃភ្ញៀវទេសចរផ្ទៃក្នុងមុនCovid-19ដែលលើសពីបណ្តាខែកន្លងមក ដែលមានចំនួនត្រឹមតែ 60-65% ដែលនេះបង្ហាញពីសញ្ញាកាន់តែវិជ្ជមាននៃចលនាទេសចរណ៍ផ្ទៃ ខណៈដែលអាជីវកម្មទេសចរណ៍កាន់តែច្រើន ពិសេសសណ្ឋាគារ និងសេវាស្នាក់នៅនានា បានបើកដំណើរការឡើងវិញជាហូហែរ។
ប៉ុន្តែចំនួនភ្ញៀវហាក់មានភាពថមថយនៅសប្តាហ៍ចុងក្រោយនៃខែកក្កដានេះ ដោយសារអាកាសធាតុមានភ្លៀងធ្លាក់ខ្លាំងស្ទើរទូទាំងប្រទេស ព្រមជាមួយពត៌មាននៃការផ្ទុះឡើងវិញមួយចំនួននៃជំងឺCovid-19នៅប្រទេសជិតខាង។
នៅតាមគោលដៅទេសចរណ៍នានាទូទាំងប្រទេស មានការយកចិត្តទុកដាក់ខិតខំជំរុញការអនុវត្តនូវគោលការណ៍ណែនាំរបស់ក្រសួងសុខាភិបាល និងវិធានសុវត្ថិភាពសុវត្ថិភាពរបស់ក្រសួងទេសចរណ៍ ក្នុងការទប់ស្កាត់ការរីករាលដាលនៃជំងឺCovid-19ដោយមានការចុះណែនាំ និងតាមដានការអនុវត្តជាប្រចាំពីគណៈអភិបាលខេត្ត និងមន្ទីរជំនាញ៕
