អាជ្ញាធរថៃទំនងជានឹងលុបចោលការធ្វើចត្តាឡីស័កចំពោះភ្ញៀវទេសចរណ៍បរទេសដែលបានចាក់វ៉ាក់សាំងប្រឆាំងវីរុស Covid-19 រួចរាល់ ក្នុងបំណងស្ដារវិស័យទេសចរណ៍ឡើងវិញ។
ប្រការខាងលើនេះនឹងអាចធ្វើទៅបាន លុះត្រាតែអ្នកទេសចរណ៍បង្ហាញលិខិតបញ្ជាក់អំពីការចាក់វ៉ាក់សាំង Covid-19 ប៉ុន្តែ សមត្ថកិច្ចនឹងនៅតែតាមដានពួកគេ នេះបើតាមនាយករដ្ឋមន្ត្រីថៃ Prayuth Chan-ocha ដែលបានថ្លែងក្រោយពីបានបញ្ចប់កិច្ចប្រជុំគណៈរដ្ឋមន្ត្រីនៅទីក្រុងបាងកកកាលពីថ្ងៃទី 23 កុម្ភៈ។ រដ្ឋាភិបាលនឹងពិនិត្យល្អិតល្អន់មុននឹងអនុវត្តតាមការកំណត់។
ប្រទេសថៃបានអនុម័តឱ្យប្រើប្រាស់វ៉ាក់សាំង Covid-19 របស់ក្រុមហ៊ុន Sinovac Biotech និង AstraZeneca នៅក្នុងប្រទេសនេះ ព្រមទាំងបានបញ្ជាទិញវ៉ាក់សាំងចំនួន 63 លានដូស ពីក្រុមហ៊ុនទាំងពីរនេះផងដែរ។ ថៃនឹងទទួលបានវ៉ាក់សាំង Sinovac លើកដំបូងចំនួន 2 លានដូស នៅក្នុងថ្ងៃនេះ។
ប្រទេសថៃក៏នឹងនាំចូលវ៉ាក់សាំងប្រឆាំង Covid-19 ពីក្រុមហ៊ុនដទៃទៀតនាពេលខាងមុខ ប៉ុន្តែ រដ្ឋាភិបាលនឹងគ្រប់គ្រងវ៉ាក់សាំងទាំងនោះនៅក្នុងដំណាក់កាលដំបូង។
ប្រទេសថៃ បច្ចុប្បន្ន មានអ្នកឆ្លងវីរុសជាង 25,000 នាក់ ក្នុងនោះមាន 83 នាក់បានស្លាប់ ប៉ុន្តែប្រទេសនេះស្ថិតនៅក្នុងចំណោមប្រទេសដែលមានករណីឆ្លងទាប។ យ៉ាងនេះក្ដី វិស័យទេសចរណ៍របស់ថៃ ក៏នៅតែទទួលរងផលប៉ះពាល់យ៉ាងធ្ងន់ធ្ងរដោយសារ Covid-19។
លទ្ធផលនៃការស្រាវជ្រាវកាលពីខែមុនរបស់អាជ្ញាធរទេសចរណ៍ថៃ (Tourism Authority of Thailand/TAT) បានបង្ហាញថា ក្រុមហ៊ុនដែលរកស៊ីក្នុងវិស័យទេសចរណ៍ប្រមាណ 34.7% បានបិទទ្វារ ឬផ្អាកដំណើរការ។ ប្រទេសថៃបានបើកទ្វារទទួលទេសចរចាប់ពីខែធ្នូ ឆ្នាំ 2020 ប៉ុន្តែ អ្នកទេសចរណ៍ដែលមកដល់ប្រទេសនេះ តម្រូវឱ្យធ្វើចត្តាឡីស័ករយៈពេល 14 ថ្ងៃ៕
ប្រភព៖ SCMP
ប្រែសម្រួល៖ បុត្រា
