ក្រសួងការងារ និងបណ្តុះបណ្តាលវិជ្ជាជីវៈបានចេញសេចក្តីប្រកាសថ្មីមួយនៅថ្ងៃនេះ ស្តីពីការពន្យារពេលក្នុងការបើករំលឹកប្រាក់បំណាច់អតីតភាពការងារដែលមានមុនឆ្នាំ2019 និងប្រាក់អតីតភាពការងារថ្មីក្នុងឆ្នាំ2020។
បើតាមក្រសួងការងារ ការពន្យារពេលនេះគឺដើម្បីឆ្លើយតបនឹងសេចក្តីណែនាំរបស់រដ្ឋាភិបាលក្នុងការជួយដល់វិស័យឯកជន ដែលទទួលរងផលប៉ះពាល់ធ្ងន់ធ្ងរពីការរាលដាលនៃជំងឺ Covid-19។ ជាការអនុវត្តក្រសួងការងារបានជួនដំណឹងដល់ម្ចាស់ ឬនាយករោងចក្រសហគ្រាស និងកម្មករនិយោជិតដែលប្រើប្រាស់កិច្ចសន្យាការងារមានថិរវេលាមិនកំណត់ (UDC) ថាការបើកប្រាក់រំលឹកប្រាក់បំណាច់អតីតភាពការងារដែលមានមុនឆ្នាំ2019 សម្រាប់ផ្នែកវាយនភន្ឌ កាត់ដេរ និងផលិតស្បែកជើង និងប្រាក់បំណាច់អតីតភាពការងារថ្មីក្នុងឆ្នាំ2020 សម្រាប់គ្រប់វិស័យត្រូវពន្យារពេលក្នុងការអនុវត្តទៅឆ្នាំ2021។
ដោយឡែកអំឡុងពេលពន្យារការអនុវត្តនេះ ម្ចាស់ ឬនាយករោងច្រកសហគ្រាសត្រូវទូទាត់ប្រាក់រំលឹកប្រាក់អតីតភាពការងារដែលមានមុនឆ្នាំ 2019 និងប្រាក់បំណាច់អតីតភាពការងារថ្មីក្នុងឆ្នាំ2020 ស្របតាមបទបញ្ញត្តិនៃច្បាប់ស្តីពីការងារ និងលិខិតបទដ្ឋានគតិយុត្តជាធរមាន នៅពេលបញ្ចប់កិច្ចសន្យាការងាររបស់កម្មករនិយោជិត លើកលែងតែការបញ្ចប់កិច្ចសន្យាដោយកំហុសធ្ងន់ធ្ងររបស់កម្មករនិយោជិត ឬកម្មករនិយោជិតលាឈប់ពីការងារដោយឯកឯង៕
