អាជ្ញាធរកម្ពុជា ជាពិសេសក្រសួងសាធារណការ និងដឹកជញ្ជូន កំពុងពិចារណាបិទខ្សែរថភ្លើងទៅកាន់អាកាសយានដ្ឋានអន្តរជាតិភ្នំពេញបច្ចុប្បន្ន ដោយសារតែមិនសូវមានជើងយន្តហោះចេញចូលច្រើន។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថាក្រសួងកំពុងពិចារណាឡើងវិញលើជើងរថភ្លើងដឹកអ្នកដំណើរពីស្ថានីយ៍ភ្នំពេញ មកព្រលានយន្តហោះដោយពីដើមធ្លាប់មានអ្នកជិះ តែឥលូវនេះមិនមានអ្នកដំណើរដោយសារមិនមានយន្តហោះចេញចូលច្រើន ហើយក៏គ្មានអ្នកដំណើរទៅព្រលានយន្តហោះតាមរថភ្លើងច្រើននោះដែរ។ ឯកឧត្តមថា ជើងរថភ្លើងមិនសូវមានមនុស្សជិះ តែអាចបង្ករគ្រោះថ្នាក់ចរាចរណ៍ច្រើននៅតាមដងផ្លូវនោះ។
ឯកឧត្តមបានបន្ថែមផងដែរថា បច្ចុប្បន្ននេះក្រសួង កំពុងពិចារណាជាមួយក្រុមហ៊ុន Royal Group ថាតើគួរបិទឬយ៉ាងណា ហើយប្រសិនបើនៅតែមិនមានអ្នកជិះបន្តទៀត ខ្សែរថភ្លើងនេះនឹងត្រូវបិទតែម្តង៕
