លោក David Unsworth បានស្នើសុំធ្វើការដឹកនាំការប្រកួតក្នុងចំនួនកំណត់មួយដើម្បីបង្ហាញថា លោកអាចធ្វើជាអ្នកចាត់ការទូទៅដ៏ស័ក្តិសមបំផុតរបស់ក្លិប Everton ក្នុងការចូលជំនួសកន្លែងរបស់លោក Ronald Koeman ក្នុងកិច្ចសន្យាជាអចិន្ត្រៃយ៍។
លោក Unsworth ដែលជាអ្នកចាត់ការទូទៅនៃក្រុមបាល់ទាត់អាយុក្រោម23ឆ្នាំរបស់ Everton បានចូលកាន់តំណែងជាបណ្តោះអាសន្ននៅឯកីឡដ្ឋាន Goodison Park ជាលើកទី2 ក្រោយការចាកចេញពីតំណែងរបស់លោក Koeman សញ្ជាតិហូឡង់។ គ្រូបង្វឹកវ័យ44ឆ្នាំរូបនេះ បានប្រកាសថា លោកចង់បានការងារនេះ និងបានចំណាយពេលប្រជុំក្នុងរយៈពេលដ៏យូរអង្វែងជាមួយនឹងលោក Bill Kenwright ដែលជាប្រធានក្លិប ក្រោយពីការចាកចេញរបស់លោក Koeman កាលពីថ្ងៃចន្ទ។ មិនមានពេលវេលាជាក់លាក់ណាមួយដែលត្រូវបានដាក់ទៅលើការកាន់តំណែងរបស់លោក Unsworth ឡើយ បើទោះបីលោកបានធ្វើការពិភាក្សាទៅលើចំនួននៃការប្រកួត កីឡាករ ក៏ដូចជាគម្រោងរយៈពេលខ្លី និងវែងជាមួយនឹងប្រធានក្លិបរបស់ Everton ក៏ដោយ។ ក្រុម Everton ត្រូវបានរំពឹងទុកថា នឹងផ្តល់ពេលវេលាដល់អតីតខ្សែការពាររបស់ពួកគេរហូតដល់ថ្ងៃសម្រាកសម្រាប់ការប្រកួតអន្តរជាតិ ដើម្បីបង្ហាញពីទេពកោសល្យនៃការដឹកនាំរបស់លោក ហើយការងារដ៏ចម្បងរបស់លោកនឹងចាប់ផ្តើមជាមួយនឹងការប្រកួតពាន Carabao Cup នៅលើទឹកដីក្រុម Chelsea នៅរាត្រីនេះ។
នៅឯសន្និសីទសារព័ត៌មានមួយមុនពេលការប្រកួតនៅរាត្រីនេះ លោក Unsworth បានឲ្យដឹងថា៖ «ខ្ញុំពិតជាបុរសដ៏មានមោទនភាពម្នាក់ដែលបានអង្គុយនៅទីនេះ ដើម្បីត្រៀមដឹកនាំក្រុម Everton នៅថ្ងៃស្អែក។ វាមិនមានបញ្ហានោះឡើយថា ចំនួនការប្រកួតប៉ុន្មានលើកដែលខ្ញុំមាននោះ ខ្ញុំនឹងប្រើប្រាស់រាល់សមត្ថភាពទាំងអស់ដែលខ្ញុំមាន»។ ការប្រកួតនេះនឹងចាប់ផ្តើមនៅម៉ោង 1:45ទៀបភ្លឺ៕
ប្រភពពី៖ The Guardian