ខ្សែប្រយុទ្ធ Lionel Messi ត្រូវបានទទួលស្គាល់ថាបានជួយសង្រ្គោះការប្រកួតដ៏រន្ធត់ចិត្តបំផុតរយៈពេល90នាទីនៃអាជីពជាកីឡាករបាល់ទាត់របស់គេ ខណៈដែលគ្រាប់បាល់ស៊ុតបញ្ចូលទីយ៉ាងល្អឥតខ្ចោះរបស់ខ្សែការពារ Marcus Rojo នៅរយៈពេល 4នាទីចុងក្រោយបានរក្សាក្តីសង្ឃឹមក្នុងព្រឹត្តិការណ៍ World Cup របស់គេ និងក្រុមជម្រើសជាតិអាហ្សង់ទីនបន្តទៅទៀត តាមរយៈការដណ្តើមបានជ័យជម្នះក្នុងលទ្ធផល 2-1 លើក្រុមជម្រើសជាតិនីហ្សេរីយ៉ា ដើម្បីឈានទៅកាន់វគ្គ 16ក្រុមចុងក្រោយ។
គ្រាប់បាល់ស៊ុតបញ្ចូលទីជាលើកទី1 របស់ Messi ក្នុងយុទ្ធនាការនេះ បានធ្វើឱ្យក្រុមម្ចាស់ជើងឯកពិភពលោក 2សម័យកាលមួយនេះ ចាប់ផ្តើមលេងបានយ៉ាងល្អឥតខ្ចោះនៅក្នុងទីក្រុង Saint Petersburg ប៉ុន្តែ ការស៊ុតបាល់ប៉េណាល់ទីនៅនាទីទី51 របស់ Victor Moses បានធ្វើឱ្យក្រុមរបស់លោក Jorge Sampaoli ប្រឈមមុខនឹងការធ្លាក់ចេញពីយុទ្ធនាការត្រឹមវគ្គចែកពូលយ៉ាងអាម៉ាស់ មុនពេល Rojo សង្គ្រោះក្រុមរបស់ខ្លួននៅពេលជិតបញ្ចប់ការប្រកួត។ នៅពេលដែលត្រូវបានសួរថា តើវាជាការប្រកួតដ៏តានតឹងបំផុតនៃអាជីពរបស់គេ ឬយ៉ាងណានោះ? Messi បានឱ្យដឹងថា៖ «ខ្ញុំមិនបានចងចាំពីភាពតានតឹងបែបណាឡើយ។ វាអាស្រ័យទៅលើស្ថានភាព និងអ្វីដែលយើងកំពុងតែដណ្តើមយក»។
ជ័យជម្នះនេះនឹងត្រូវធ្វើឱ្យអាហ្សង់ទីន ជួបការប្រកួតដ៏ស្វិតស្វាញមួយទៀតក្នុងវគ្គ 16ក្រុមចុងក្រោយ ដោយពួកគេនឹងត្រូវប៉ះជាមួយនឹងក្រុមជម្រើសជាតិបារាំង ដែលបានបញ្ចប់ក្នុងលទ្ធផលស្មើ ០-០ ជាមួយនឹងក្រុមជម្រើសជាតិដាណឺម៉ាក ក្នុងការប្រកួតចុងក្រោយនៃពូលរបស់ពួកគេ នៅថ្ងៃដដែលនោះ។ ស្របពេលជាមួយគ្នានេះ ក្រុមបាល់ទាត់ជម្រើសជាតិក្រូអាស៊ី ដែលបានផ្តួលក្រុមជម្រើសជាតិអ៊ីស្លង់ ក្នុងលទ្ធផល 2-1 ក្នុងការប្រកួតចុងក្រោយនៃពូលរបស់ពួកគេនោះ នឹងត្រូវធ្វើដំណើរទៅជួបក្រុមជម្រើសជាតិដាណឺម៉ាក ក្នុងវគ្គ 16ក្រុមចុងក្រោយ៕
ប្រភពពី៖ Worldsoccertalk
