ក្រុមបាល់ទាត់ជម្រើសជាតិកូរ៉េខាងត្បូង អាយុក្រោម 23ឆ្នាំ បានឈានទៅកាន់ការប្រកួតវគ្គផ្តាច់ព្រ័ត្រ ក្នុងវិញ្ញាសាកីឡាបាល់ទាត់ នៃព្រឹត្តិការណ៍ Asian Games ឆ្នាំ2018 ក្រោយពីបានផ្តួលក្រុមជម្រើសជាតិវៀតណាមដោយពិន្ទុ 3-1 ក្នុងវគ្គពាក់កណ្តាលផ្តាច់ព្រ័ត្រ នាកីឡដ្ឋាន Pakansari ក្នុងទីក្រុងហ្សាការតា កាលពីថ្ងៃពុធ។
គ្រាប់បាល់ 3គ្រាប់ទាំងនោះ ត្រូវរកបានដោយខ្សែបម្រើអន្តរជាតិកូរ៉េខាងត្បូង Lee Seungwoo នៅនាទី ទី7 និងទី55 និងដោយខ្សែប្រយុទ្ធ Hwang Ui Jo នៅនាទីទី28។ ក្រុមជម្រើសជាតិវៀតណាម បានធ្វើការវាយបកបាន 1គ្រាប់វិញតាមរយៈគ្រាប់បាល់របស់កីឡាករ Tran Minh Vuong នៅនាទីទី70។
លោក Kim Hak Bum គ្រូបង្វឹកនៃក្រុមជម្រើសជាតិកូរ៉េខាងត្បូង បានប្រើប្រាស់កីឡាករ 4នាក់ដែលបានចូលរួមប្រកួតក្នុងព្រឹត្តិការណ៍ World Cup ឆ្នាំ2018 រួមមានអ្នកចាទី Jo Hyeonwoo ខ្សែប្រយុទ្ធ Son Heung Min និង Hwang Hee Chan និងខ្សែបម្រើ Lee Seungwoo។ ខ្សែប្រយុទ្ធ Son របស់ក្លិប Tottenham Hotspur បានទទួលតួនាទីជាប្រធានក្រុម ខណៈដែលកូរ៉េខាងត្បូង បានផ្តួលក្រុមជម្រើសជាតិវៀតណាម ដើម្បីឈានទៅវគ្គផ្តាច់ព្រ័ត្រ ក្នុងវិញ្ញាសាកីឡាបាល់ទាត់ផ្នែកបុរស ដោយនេះ គឺជាឱកាសចុងក្រោយរបស់គេក្នុងការឈ្នះមេដាយមាសដែលនឹងធ្វើឱ្យរូបគេរួចផុតពីការបំពេញកាតព្វកិច្ចយោធារយៈពេល 21ខែ។
តារាឆ្នើមក្នុងព្រឹត្តិការណ៍ World Cup ដែលការបញ្ជូនបាល់ដ៏ឆ្លាតវៃរបស់គេបានជួយឱ្យកីឡាករ Hwang Ui-jo រកបានគ្រាប់បាល់ទី2 សម្រាប់កូរ៉េខាងត្បូងនោះ បានឱ្យដឹងថា៖ «យើងកំពុងតែខិតកាន់តែកៀកក្នុងការឈ្នះមេដាយមាស ក៏ដូចជាបង្កើតប្រវត្តិសាស្ត្រដែរ ហើយយើងនឹងប្រជែងសម្រាប់មេដាយមួយនេះ»។
ការប្រកួតវគ្គផ្តាច់ព្រ័ត្រនឹងប្រព្រឹត្តទៅនៅថ្ងៃសៅរ៍នេះ ខណៈដែលកូរ៉េខាងត្បូង នឹងត្រូវជួបជាមួយនឹងជប៉ុន ដែលបានផ្តួលក្រុមជម្រើសជាតិអេមីរ៉ាតអារ៉ាប់រួម 1-០ ក្នុងការប្រកួតវគ្គពាក់កណ្តាលផ្តាច់ព្រ័ត្រមួយផ្សេងទៀត៕
ប្រភពពី៖ Asian Games
