គណៈកម្មការរៀបចំការប្រកួតបាល់ទាត់ថៃ ដែលជាអ្នកកាន់កាប់ការប្រកួតក្របខ័ណ្ឌលីកកំពូលថៃទាំងអស់ (Thai League) បានប្រកាសពីគម្រោងដាក់ឱ្យគ្រប់ក្លិប និងប្រព័ន្ធផ្សព្វផ្សាយ (អ្នកសារព័ត៌មាន) ទាំងអស់ត្រូវធ្វើតេស្តរកមេរោគកូវីដ-19 រៀងរាល់ការប្រកួត និងចេញថ្លៃធ្វើតេស្តដោយខ្លួនឯង។
មកទល់នឹងពេលនេះ ថៃបានដាក់ផែនការចាប់ផ្តើមប្រកួតឡើងវិញនៅខែកញ្ញាខាងមុខនេះ ប្រសិនបើមានការធូរស្បើយមែនទែន។ ជុំវិញរឿងការត្រឡប់មកវិញនៃក្របខ័ណ្ឌលីកកំពូលថៃនេះដែរ សហព័ន្ធកីឡាបាល់ទាត់ថៃ បានទទួលការណែនាំពីគណៈកម្មការគ្រប់គ្រងជំងឺកូវីដ-19 ថៃ ដោយតម្រូវឱ្យកីឡាករត្រូវពិនិត្យរកជំងឺនេះ ៣ថ្ងៃមុនការប្រកួតនីមួយៗ ពោលគឺរៀងរាល់សប្តាហ៍ទៅលើកីឡាករ និងអ្នកដែលនឹងត្រូវមានវត្តមានគ្រប់រូបនៅកីឡដ្ខាន។
ការពិនិត្យនេះផងដែរ សហព័ន្ធកីឡាបាល់ទាត់ថៃក៏បានប្រកាសផងដែរថា វាមិនមែនជាបន្ទុកចំណាយរបស់សហព័ន្ធឡើយ វាគឺជាការចំណាយផ្ទាល់ខ្លួនរបស់បុគ្គលនីមួយៗ ដែលនៅក្នុងការពិនិត្យម្តង មានតម្លៃប្រហែល 30ដុល្លារ៕
