គ្រប់ការប្រកួត UEFA Champions League ដែលនៅសេសសល់ទាំងប៉ុន្មាន បានលើកទៅធ្វើនៅប្រទេសព័រទុយហ្គាល់ទាំងអស់ ហើយកាលវិភាគប្រកួត គឺកៀកៗគ្នា ដើម្បីជាការងាយស្រួលសម្រាប់ក្រុមទាំងអស់ មិនចាំបាច់ហោះហើរទៅមក ដែលនាំឱ្យមានហានិភ័យពីជំងឺកូវីដ-19។
ដោយឡែក ក្លិប Atlético Madrid បានរកឃើញមានកីឡាកររបស់ខ្លួនចំនួន 2នាក់មានផ្ទុកមេរោគកូវីដ-19 និងថែមទាំងបានបញ្ជាក់យ៉ាងច្បាស់ទៀតផងថា កីឡាករ 2រូបនោះគឺ ខ្សែប្រយុទ្ធ Angel Correa និងខ្សែការពារ Sime Vrsalijko ដោយពួកគេទាំង 2នាក់នៅមានសុខភាពល្អ តែតម្រូវឱ្យទៅគេងសម្រាកព្យាបាលនៅមន្ទីរពេទ្យ ដូច្នេះ សម្រាប់ការប្រកួតវគ្គ 1/4 ដែល Atlético Madrid ត្រូវជួបនឹង RB Leipzig ថ្ងៃទី13 ខែសីហា ខាងមុខនោះ នឹងត្រូវអវត្តមានកីឡាករទាំង 2រូបនេះយ៉ាងពិតប្រាកដ។
គួរបញ្ជាក់ផងដែរថា បន្ទាប់ពីមានរឿងហេតុខាងលើកើតឡើងបែបនេះ ការប្រកួតរវាង Atletico តទល់នឹង Leipzig ក្នុងក្របខ័ណ្ឌ UEFA Champions League វគ្គ 8ក្រុមចុងក្រោយ នៅថ្ងៃទី13 ខែសីហា ខាងមុខ មិនទាន់ដឹងថា តើអាចដំណើរការបាន ឬក៏យ៉ាងណានៅឡើយទេ៕
